Aleatët e PD/ Zgjedhjet pa opozitën, rrezik për stabilitetin e vendit

Pas Tiranës dhe Durrësit, ”Forumi për zgjedhje të lira” i organizuar nga ”Grupimi i Qendrës së Djathtë” sot ka qëndruar në qytetin e Fierit.

Aleatët e Partisë Demokratike, Shehi, Ndoka, Mediu, Dule dhe Duka, gjatë një bashkëbisedimi rreth situatës në vend, kanë sqaruar para strukturave dhe anëtarësisë në qytetin e Fierit, arsyet pse kanë ndërmarrë këtë nismë dhe i kanë informuar me ”Platformën për marrëveshje kushtetuese”, 12 pikat e së cilës janë prezantuar kohë më parë.

”Zgjedhjet pa opozitën përbëjnë një rrezik të madh për stabilitetin e vendit si dhe cenojnë pluralizmin politik. Opozita, në të gjitha mënyrat, nuk do të lejojë që në 30 qershor të zhvillohen zgjedhje farsë. Zgjedhje të lira dhe të ndershme mund të organizohen dhe garantohen vetëm nga një qeveri Tranzitore, e përberë nga njerëz me integritet dhe autoritet, të cilët e duan vendin e tyre,” u tha nga Aleatët e Lulzim Bashës.

Duke komentuar dy protestat e fundit kombëtare, të zhvilluara nga opozita e bashkuar, liderët e PR, PDK, PBDNJ dhe LZHK i kanë bërë apel qytetarëve për vijimin e qëndresës ndaj mazhorancës ilegjitime ndërsa u shprehën qartë se zgjedhje me Edi Ramën kryeministër nuk mund të zhvillohen dhe se protestat do të vazhdojnë.