Emergjente, Basha në Dhomën e Lordëve: Shkëputja e lidhjeve të krimit me politikën!
Hapi më emergjent është shkëputja e lidhjeve të provuara mes krimit të organizuar dhe politikës, tha në mbyllje të vizitës së tij në Parlamentin Britanik, Kryetari i Partisë Demokratike, Lulzim Basha, si i ftuar nderi në një darkë pune me anëtarët e Parlamentit dhe Dhomës së Lordëve në Londër, ku në qendër të diskutimeve ishte siguria dhe stabiliteti në Europën Juglindore dhe kriza politike në Shqipëri.
“Autokratët e korruptuar përbëjnë një kërcënim për demokracinë dhe stabilitetin. Kriza e thellë ne Shqipëri ilustron qartë se pa demokraci dhe sundim të ligjit nuk mund të ketë stabilitet dhe as zhvillim ekonomik,” tha Lulzim Basha duke sqaruar se pse janë jetike dhe zgjedhjet e lira dhe të ndershme:
“Forcimi i institucioneve demokratike, kontrolli dhe kufizimi i pushteteve, drejtesia e pavarur dhe zgjedhjet e lira janë parakusht për integrimin e vendeve tona në BE. Zgjedhjet e lira dhe të ndershme janë jetike për demokracinë dhe legjitimitetin e qeverisë para qytetarëve. Për këtë qëllim hapi më emergjent është shkëputja e lidhjeve të provuara mes krimit të organizuar dhe politikës.”
Lideri i opozitës i njohu bashkëbiseduesit me propozimet e PD dhe opozitës së bashkuar për daljen nga kriza përmes një procesi të lirë zgjedhor nën kujdesin e një qeverie tranzitore, e cila do t’i çlirojë duart drejtësisë për t’i dhënë fund pandëshkueshmërisë së politikanëvë të kapur në bashkëpunim me krimin për vjedhjen e zgjedhjeve dhe do të përmbushë të gjitha parakushtet e ngarkuara me ligj për të gararantuar votën e lirë.
“Vetëm një qeveri e dalë nga vota e lirë mund të luftojë krimin e organizuar që e ka shndërruar Shqipërinë, sipas raportit të Departamentit amerikan të Shtetit, në një bazë operacionale të rrjeteve kriminale, që veprojnë nga Amerika në Europë dhe Lindjen e Mesme.”
Miqtë britanikë, Kryetari i Partisë Demokratike i informoi edhe me programin e Partisë Demokratike, në veçanti, me masat që do të marrë përmes vetingut të politikanëve dhe goditjes me tolerancë zero të krimit dhe konfiskimit të aseteve kriminale.
Këto masa, tha ai, synojnë t’u japin fund trafiqeve dhe pastrimit të parave të pista të krimit, në mënyrë qe të hapet rruga për Shqipërinë e standarteve europiane me barazai para ligjit, liri dhe mundësi për të gjithë qytetarët e saj.
“Për Partinë Demokratike është prioritet strategjik forcimi dhe zgjerimi i bashkëpunimit me Mbretërinë e Bashkuar jo vetëm në fushën e sigurisë dhe luftën kundër krimit, por në veçanti, në fushën ekonomike dhe atë te investimeve britanike,” tha në përfundim të vizitës së tij në Londër Kryetari i PD, Lulzim Basha, duke shprehur mirënjohjen për takimet e frytshme të nivelit të lartë dhe interesin e madh me të cilin autoritetet britanike përcollën krizën politike në Shqipëri; I bindur se me ndihmën e Mbretërisë së Bashkuar dhe partnerëve tanë strategjikë euroatlantikë, Shqipëria do ta kapërcejë këtë krizë dhe do t’i japë fund tranzicionit të tejzgjatur përmes reformave të thella politike që do të cimentojnë kontrollin demokratik të qeverisjes nga qytetarët dhe sundimin e ligjit.
Gjithashtu, ai shprehu dhe mirënjohje për ndihmën e çmuar të Britanisë së Madhe për kapërcimin me sukses të sfidave jetike për paqen dhe stabilitetin në Ballkan, në veçanti, në luftën e Kosovës dhe procesin e pavarësimit të saj, në konfliktin e armatosur në Maqedoni e Marrëveshjen e Ohrit dhe, së fundmi, Marrëveshja e Prespës që shërben për të konsoliduar perspektivën afatgjatë euroatlantike të rajonit, duke garantuar anëtarësimin e saj në NATO.
Ndryshe, në mbyllje të vizitës së tij në Parlamentin Britanik dhe Dhomën e Lordëve, Kryetari i Partisë Demokratike, Lulzim Basha ishte i ftuar i nderi në një darkë pune me anëtarë të Parlamentit dhe Dhomës së Lordëve në Londër, ku ishin prezent Ish-Sekretari i Përgjithshëm i NATO-s dhe anëtar i Dhomës së Lordëve, Lordi George Robertson, deputetët Crispin Blunt, Sir Mark Lyall Grant, anëtari i Parlamentit Britanik dhe lidershipit të Konservatorëve dhe Ish-Ministër i Mbrojtjes, Gavin Williamson, si dhe Ish-Kryedrejtuesi i Shërbimeve të Sigurisë në Irlandën e Veriut, Sir Hugh Orde.
