Fletarreste për bossët e Veriut: Vesellinoviç, Radojiçiq e Mihajlloviç

Me kërkesë të Gjykatës kompetente, në Ministrinë e Drejtësisë është dorëzuar urdhëresa për fletarreste ndërkombëtare për tre persona, ndërsa këto fletarreste kanë arritur edhe në Drejtorinë e Policisë së Kosovës për rajonin e veriut.

Burime të KosovaPress bëjnë të ditur se bëhet fjalë për bosët e nëntokës në Veri të Kosovës, Zvonko Vesellinoviç, Millan Radojçiq dhe Millan Mihajlloviç, i njohur me nofkën “Pop”.

Veselinoviq, Radojçiq dhe Mihajlloviq, për banorët e veriut janë të njohur si sinonim i nëntokës, i dhunës, kërcënimeve dhe distribuimit të narkotikëve.

Sipas këtyre burimeve, ata punojnë së bashku kohë të gjatë dhe përveç që kanë pasuri marramendëse, janë të lidhur edhe me kompanitë më të mëdha në Serbi.

“Bosët e veriut kanë qenë të akuzuar për pasurim të paligjshëm edhe në Serbi, derisa nga partnerët e tyre, kompanitë dhe bankat, janë konsideruar si klientë shumë të rëndësishëm. Mirëpo në fund të gjykimit para disa viteve, u konstatua se aktakuza ndaj tyre ka qenë e motivuar politikisht dhe si e tillë, me ndërrimin e pushtetit në Serbi, ka përfunduar në shportën për bërllok të Gjykatës speciale për krim të organizuar në Beograd,” theksojnë burime të KosovaPress duke shtuar se bosët pasi janë liruar me “duar të pastërta dhe faqebardhë”, kanë arritur ndër vite që me punë të kundërligjshme të ngrisin pasurinë dhe pushtetin e tyre, si në Kosovë, ashtu edhe në Serbi.

Emri i Millan Radojçiqit, i njohur më shumë për opinionin kosovar si nënkryetar i Listës Srpska, ndërlidhet me shumë ngjarje në veri, duke përfshirë edhe vrasjen e politikanit Oliver Ivanoviç .

Ai arriti t’ju ikë organeve të rendit gjatë një operacioni të këtyre të fundit muaj më parë në Veri , me ç’rast ishin arrestuar katër persona, ndërsa prej atëherë besohet se ndodhet në Serbi, madje shfaqet publikisht së bashku me krerët e shtetit të Serbisë në takimet me Listën Srpska.