Taksa acaron raportet Kosovë-Serbi, paralajmërohen masa edhe më të ashpra

Vendosja e taksës nga ana e Kosovës për mallrat e Serbisë po vazhdon të sjellë debate të ashpra mes dy shteteve. Tash kur kanë kaluar më shumë se gjashtë muaj nga vendosja e taksës 100 për qind, raportet mes Kosovës dhe Serbisë  janë acaruar edhe më shumë. Zyrtarët e dy shteteve kanë paralajmëruar shtim të masave.

Serbia po vazhdon sulmet e saj ndaj shtetit të Kosovës lidhur me taksën për mallrat.

Presidenti i Serbisë, Aleksandar Vuçiç dy ditë më parë ka takuar përfaqësuesit e Listës Serbe me të cilët ka diskutuar për masat që Serbia do t’i ndërmarrë kundër Kosovës për shkak të taksës ndaj mallrave serbe.

Vuçiç ka paralajmëruar masa të rrepta kundër Kosovës, pas Samitit të Parisit. Ai, po ashtu, ka thënë se nuk do të ketë kurrfarë bisedimesh me Kosovën derisa të mos hiqet taksa.

“Masa shumë të fuqishme e shumë të rrepta kemi përgatitur, do të shikojmë që me to të mos i godasim njerëzit tanë ë Kosovë. Me to do të fillojmë pas takimit ë Parisit”, ka  thënë Vuçiç.

Ka thënë se në Paris nuk do të ketë kurrfarë bisedimesh për Kosovën dhe statusin saj, nuk do të ketë kurrfarë bisedimesh derisa të mos hiqet taksa.

“Hiqni taksat e do të bisedojmë për çdo gjë që dëshironi, do të flasim për kohën e mirë e të keqe”, ka thënë Vuçiçi.

E  kryeministri i Kosovës, Ramush Haradinaj, në një status në Facebook i është përgjigjur kërcënimeve të presidentit serb, Aleksandar Vuçiç i cili tha se pas Samitit të Parisit do të ndërmarrin masa të ashpra ndaj Kosovës si kundërpërgjigje për taksën ndaj mallrave serbe.

Kryeministri i Kosovës i ka thënë presidentit serb se është koha që ai të reflektojë.

“Reflekto Z. Vuçiç! Është koha që të prezantosh vlera europiane dhe jo qëndrime të cilat i ke prezantuar në të kaluarën, qëndrime këto që kanë shkaktuar tragjedi dhe dhimbje. Shteti i Kosovës është edhe shteti i serbëve të Kosovës, një shoqëri që ne e ndajmë së bashku. Neve na duhet shpresë dhe Kosova është gati për marrëveshje me të cilën pranohet realiteti i dy shteteve, në kufijtë ekzistues dhe respekt reciprok” shkruan Haradinaj në reagim.

Kurse sot ministri serb i Tregtisë dhe i Telekomunikacionit, Rasim Lajiq tha se nuk guxojmë të presim që lejlekët të na e kthejnë Kosovën në sistemin kushtetues e juridik të Serbisë.

Duke folur rreth taksës që Kosova e ka vënë ndaj mallrave të Serbisë Lajiq ka thënë se “nga taksa Beogradi ka pasur dëm ekonomik, por  Kosova ka pasur dëm të madh politik, pasi që ajo tash s’e ka më përkrahjen e pa rezervë që e ka pasur”.

E drejtori i të ashtuquajturës Zyrë për Kosovën në qeverinë e Serbisë, Marko Gjuriq, gjatë ditës së djeshme ka kritikuar kryeministrin e Kosovës Ramush Haradinajn për qasjen e tij kundër dialogut.

Ai e ka fajësuar Haradinajn se përgjatë dy vjetëve të qeverisjes i ka shkatërruar të gjitha marrëveshjet Kosovë – Serbi.

“Për dy vite, Haradinaj ka shkatërruar të gjitha marrëveshjet Kosovë-Serbi. Ai është duke bërë gjithçka që ta ulë rëndësinë e dialogut Beograd-Prishtinë.

E taksa ndaj produkteve që vijnë nga Serbia dhe Bosnja duket se nuk do të jetë masa e vetme që Ministria e Tregtisë do të aplikojë.

Ministri Endrit Shala ka paralajmëruar se Ministria që ai e drejton do t’i propozojë Qeverisë edhe masa të tjera të nevojshme të cilat ndihmojnë ekonominë e vendit dhe prodhuesit.

“Fokusi im është përkrahja e prodhimit vendor, por kjo nuk nënkupton edhe përkrahje në raport edhe me bizneset e tjera dhe me tregtinë në përgjithësi në Kosovë. Ne kemi marrë disa masa deri më tash, si ajo 100 për qind në raport me produktet e Serbisë, pastaj masa për ndalimin e eksportit të drurit. Jemi duke bërë analiza edhe të sektorëve tjerë të tregut në Kosovë dhe varësisht prej këtij monitorimi të tregut dhe prej kërkesave të prodhuesve tanë vendorë dhe duke u bazuar në ligjet në fuqi por njëkohësisht edhe duke respektuar marrëveshjet ndërkombëtare të cilat Qeveria e Kosovës, i ka si marrëveshjet e MSA-së dhe CEFTA, Ministria e Tregtisë dhe Industrisë do i propozon Qeverisë të gjitha masat e nevojshme”.

Më 21 nëntor të vitit të kaluar, Qeveria e Kosovës kishte marrë vendim që të vendosë taksë prej 100 për qind ndaj Serbisë dhe Bosnje e Hercegovinës. Qeveria këtë vendim e kishte marrë si kundërpërgjigje ndaj Serbisë për shkak të propagandës së saj të vazhdueshme kundër Kosovës.

Kosova nga Serbia brenda një viti, së paku zyrtarisht, importon mallra në vlerë 400 milionë euro, por eksporton vetëm rreth 40 milionë euro për në serbi.

Që nga vendosja e taksës ndaj mallrave serbe është bllokuar edhe dialogu Kosovë-Serbi, pasi që pala serbe po e kushtëzon vazhdimin e dialogut me heqjen ose pezullimin e taksës mirëpo, qeveria e Kosovës po vazhdon të këmbëngulë se taksa do të hiqet vetëm kur Serbia e Bonja të njohin pavarësinë e Kosovës.

Shfuqizim apo pezullim të taksës ka kërkuar edhe Bashkimi Evropian dhe Shtetet e Bashkuara të Amerikës në mënyrë që të vazhdohet dialogu Kosovë-Serbi./Monitor/