Kosnett-Mustafa, zgjedhjet në LDK dhe dialogu me Serbinë

Kryetari i LDK-së, Isa Mustafa ka nisur mandatin e tretë sot me një takim me Ambasadorin e SHBA-së në Kosovë, Philip Kosnett, ku u diskutua për zgjedhjet e brendshme të LDK-së, situata aktuale politike dhe kthimit në tryezën e bisedimeve me Serbinë.

“Kryetari Mustafa e njoftoi Ambasadorin Kosnett për ecurinë e procesit zgjedhor të LDK-së dhe theksoi se Lidhja Demokratike e Kosovës vlerëson që vendi duhet të shkojë në zgjedhje të përgjithshme sa më parë,” thekson LDK përmes një njoftimi duke shtuar se ka përgatitur programin qeverisës për qeverinë e re ku prioritet do të jenë luftimi i korrupsionit dhe krimit të organizuar, përmbyllja e dialogut me Serbinë, përshpejtimi i proceseve integruese në strukturat euroatlantike, zhbllokimi i potencialit ekonomik përmes përkrahjes së sektorit privat, etj. 

Ambasadori Kosnett nga ana e tij është shprehur se është e rëndësishme që Kosova të ruajë fokusin e vet në fuqizimin e sundimit të ligjit, kthimit në tryezën e bisedimeve me Serbinë, për të arritur normalizim dhe për të krijuar mundësi të cilat lejojnë qytetarëve të Kosovës të kontribuojnë në prosperitetin e Kosovës. 

Të pranishëm në takim me Ambasadorin amerikan ishin edhe Agim Veliu, Lutfi Haziri, Vjosa Osmani, Vlora Dumoshi dhe Besian Mustafa.