Përgjigje rilindase: Mora vesh që Lulzim Basha, ka nevojë për mua!

Duke ngatërruar Partinë Socialiste me Partinë Demokratike ashtu si dhe mënyrën e komunikimit dhe arritjen e qëllimeve, Ish-Zv/Kryeministrja Senida Mesi i përgjigjet Kryetarit të PD, Lulzim Basha, i cili duke komentuar debatin ndër socialist thekson se Senida Mesi ua mohon kontributin socialistëve dhe ia njeh atë një personi jashtë Partisë Socialiste, trafikantit më të fuqishëm të drogës në zonën Shkodrës, Pëllumb Gjoka:

“Mora vesh që Lulzim Basha, ka nevojë për mua për ‘kauzën e tij RAMA IK’, se normal edhe ato pak demokratikas që kishte i largoi dhe përmes ‘proçesverbalit’ të mbledhjes së PS Shkodër të shkruar në zyrat e PD-së kërkon ndihmë,” thekson Senida Mesi duke vazhduar ti drejtohet Lulzim Bashës me fjalorin rilindas “po të ishte burrë” ndonëse nuk sqarohet se kush ia ka nevojën burrit, ajo apo lideri i saj, ndërsa shton se është vetë ajo që fiton betejat që ka para:

“Lulzim Basha, betejat e mija në jetë i kam bërë dhe do vazhdoj t’i bëj vetë, me integritet dhe dinjitet. Po ti kur do i bësh i vetëm betejat e tuaja?”

Ndryshe, gjatë debatit të publikuar pardje mes socialistëve dhe Senida Mesit, për të mos ia dorëzuar Shkodrën Tom Doshit siç urdhëronte Edi Rama, flitet për votat e siguruara në Velipojë. Senida Mesi ua mohon kontributin socialistëve dhe ia njeh atë një personi jashtë Partisë Socialiste. Ky person sipas Kryetarit të Partisë Demokratike, Lulzim Basha, është njëri nga trafikantët më të fuqishëm të drogës në zonën e Velipojës dhe Shkodrës, Pëllumb Gjoka:

Ja postimi i plotë:

Mora vesh që Lulzim Basha, ka nevojë për mua për “kauzën e tij RAMA IK”, se normal edhe ato pak demokratikas që kishte i largoi dhe përmes “proçesverbalit” të mbledhjes së PS Shkodër të shkruar në zyrat e PD-së kërkon ndihmë.

Po të ishte burrë, s’do kishte patur nevojë të më citonte dhe të thoshte atë çfarë unë paskam “dëshmuar”, por do e kishte thënë vetë.

Po të ishte lider, do të kishte gjetur vetë provat dhe do të kishte dërguar gjithë të fortët dhe trafikantët pas hekurave që në kohën kur ishte Ministër i Brendshëm.

Lulzim Basha, betejat e mija në jetë i kam bërë dhe do vazhdoj t’i bëj vetë, me integritet dhe dinjitet. Po ti kur do i bësh i vetëm betejat e tuaja?

Lulzim Basha, nëse do të bësh ndryshimin, krijo besimin dhe parakushti është të thuash të vërtetën. Njerëzit mund të falin gabimet e mendjes por jo ato të shpirtit.

Nuk jam unë as shkaku e as problemi, shiko nga vetja dhe së paku të kuptosh një herë të vetme se loja jote jashtë sistemit ka vetëm një emër Dështim, ndërsa ai që sjell dështimin e ka një emër Dështak.