Vuçiç: S’mund ta njohim Kosovën pa kompromis

Senatorët amerikanë, Chris Murphy dhe Ron Johnson, pas takimit me Presidentin e Serbisë, Aleksandar Vuçiç thanë se duan të bëjnë gjithçka të mundur për të mbështetur dialogun për normalizim të marrëdhënieve midis Kosovës dhe Serbisë, raporton RFE.

Dy senatorët theksuan me këtë rast se procesi i dialogut do të kërkojë shumë kompromise dhe sakrifica nga të dyja palët, por shtuan se pasi të arrihet marrëveshja:

“Potencialet dhe përfitimet për të dyja vendet do të jenë më të mëdha se ajo që mund të humbet në negociata”.

Republikani Johnson duke theksuar se Amerika është mike e popullit serb shtoi:

“Amerika dëshiron të bëjë gjithçka të mundur për të mbështetur dialogun dhe procesin, në të cilin të dy popujt duhet të japin diçka dhe të marrin diçka.”

Ndërkohë demokrati Murphy tha se shpreson se pas zgjedhjeve në Kosovë, edhe autoritetet në Prishtinë do t’i bëjnë hapat e nevojshëm për vazhdimin e dialogut.

“Mbështetja për dialogun Serbi-Kosovë është një çështje, për të cilën edhe demokratët, edhe republikanët në SHBA bien dakord.”

Ndërsa Aleksandar Vuçiç u tha senatorëve amerikanë se Beogradi pret heqjen e taksës dhe se do arritjen e një marrëveshjeje të kompromisit.

“Kjo zgjidhje nuk mundë jetë përmbushje e qëllimeve të njërës palë”, kurse pala serbe të mos fitojë asgjë. Serbia mund të diskutojë çdo gjë vetëm nëse ka zgjidhje kompromisi. Në qoftë se nuk ekziston një zgjidhje kompromisi, ne nuk mund ta njohim pavarësinë e Kosovës. Dhe, këtu nuk ka filozofi të madhe,” tha Vuçiç duke e pranuar se është i ndërgjegjshëm edhe për faktin se:

“Përmirësimi i marrëdhënieve midis serbëve dhe shqiptarëve dhe vendosja e paqes së qëndrueshme do të ishte e dobishme për serbët dhe shqiptarët, si dhe për të gjithë popujt që jetojnë në rajon.”

Ndryshe, senatorët amerikanë qëndruan këtë javë edhe në Prishtinë.

Dialogu midis Kosovës dhe Serbisë është pezulluar prej se Kosova ka vendosur taksë për prodhimet e importuara nga Serbia, në nëntor të vitit 2018.