73 vjetori, Ademi: Mesazhin e Kryengritjes së Postribës duhet ta zbatojmë sot përballë diktaturës…

Me rastin e 73- vjetorit të Kryengritjes Antikomuniste të Postribës, e para në Europën Lindore, Kryetarja e Bashkisë Shkodër, Voltana Ademi tha se ata burra që dhanë jetën në vitin 1946 dhe të tjerët që u burgosën dhe internuan na kanë lënë një mesazh: Bashkimi është arma më e mirë kundër të keqes së përbashkët. Sot këtë mesazh na mbetet ta vëmë në zbatim duke ju vënë të gjithë përballë diktaturës që është instaluar e me të cilën duhet të përballemi deri në fund.

“Sot jemi këtu për të kujtuar por më shumë për të shprehur krenarinë e natyrshme si pasardhës të atyre burrave kreshnik që me thirrje kush të dojë e kush të mundet iu kundërvunë bishës sllavo-komuniste. Përmasat e kësaj ngjarje tragjike si një zanafillë e hidhur të asaj që Shqipëria dhe shqiptarët vuajtën për 45 vjet diktaturë, përkujtojmë sot. 64 burra u vranë, 1.200 të tjerë u burgosën dhe u internuan. U dogjën, shkatërruan dhe sekuestruan shumë shtëpi e pasuri.”

Kryengritja e Postribës, tha Voltana Ademi, nuk u ngjiz rastësisht në këtë trevë, historia e ka parë gjithmonë të rreshtuar postribën përballë pushtuesëve.

“Kështu ndodhi në mbrojtjen e Ulqinit, po kështu në vitin 1912, 1914, për mbrojtjen e Shkodrës nga malazezët, më 1920 edhe në luftën e Koplikut morën pjesë 200 luftëtarë nga Postriba. Në ditën e parë të pushtimit italianë, luftën e dytë botërore, përsëri postribakët u vunë përballë pushtuesëve,” tha kryebashkiakja e Shkodrës duke shtuar se nuk kishte si të ndodhte ndryshe edhe me pushtimin komunist që nisi më 29 nëntor 1944 dhe Postriba përsëri do ta priste me një qëndresë të pashoqe deri në vetëflijim.

“Burra të mençur të Shkodrës e të Postribës ndoshta më shpejtë se askush në Evropën lindore e kuptuan rrezikun që i kanosej Shqipërisë pikërisht për këtë vendosën ti kundërvihen komunistëve duke pasur në themel bashkimin e të gjithë nacionalistëve nga qyteti e fshatërat, nga malet dhe fushat e Shkodrës.”

Historia ka thënë diçka për këtë ngjarje, për këtë ngjarje të rëndësishme, tha Ademi, por mbetet akoma edhe më shumë për të bërë për të nxjerrë në dritë të së vërtetëes atë që 45 vjet komunizmi u mundua ta fshijë, lëvizjen e Postribës.

“Në fakt bëhej fjalë për një Kryengritje të vërtetë, kryengritje popullore e burrave trima të Shkodrës dhe Postribës, për ti thënë diktaturës se nuk do ta mposhte kurrë shpirtin antikomunist të shqiptarëve.”

Sot 73 vjet më pas, kryengritja antikomuniste e Postribës, mesazhet e saj janë më aktuale se kurrë. Një diktaturë ka filluar të instalohet në vend, po shkelen me dhunën e pushtetit edhe liritë më elementare dhe të shenjta të cilat i kemi fitu prej 30 vitesh, tha Kryetarja e Bashkisë Shkodër, Voltana Ademi, sot kur nuk po na lejojnë as të drejtën e votës, të drejtën e fjalës, të drejtën e zgjedhjes, të atyre që duam të na drejtojnë në këtë vend, ndërsa përfundoi:

“Ata burra që dhanë jetën në vitin 1946 dhe të tjerët që u burgosën dhe internuan na kanë lënë një mesazh: Bashkimi është arma më e mirë kundër të keqes së përbashkët, e sot këtë mesazh na mbetet ta vëmë në zbatim duke ju vënë të gjithë përballë diktaturës, asaj që është instaluar e me të cilën ne duhet të përballemi deri në fund.”

Me këtë rast, në memorialin përkujtimor pranë Njësisë Administrative Postribë, janë bërë homazhe dhe janë vendosur kurora me lule nga Bashkia Shkodër, Këshilli i Qarkut Shkodër, drejtues e përfaqësues të PD-së dhe partive të tjera, nga Shoqata e Ish-të Përndjekurve Politikë Antikomunist të Shqipërisë dhe të Shkodrës, të zgjedhur vendorë e në institucione qendrore, familjarë të pjesëmarrësve në ngjarjen e vitit 1946.

Ky aktivitet u organizua nga Bashkia Shkodër ndërsa ka vijuar me panairin tradicional që promovon traditat e zonës së Postribës, produkteve por edhe kulinarisë.