E rritën qeverinë, dhe e rrudhën shtetin, Kurti: Më 6 Tetor kjo merr fund!

Kryetari i Lëvizjes Vetëvendosje, Albin Kurti sot duke prezantuar listën e kandidatëve për deputet në zgjedhjet e 6 tetorit tha se lista përfshinë juristë që e njohin Kushtetutën dhe ekonomistë që njohin mundësitë ekonomike të Kosovës, njerëz që e dinë se çfarë politika duhen për të kaluar nga një ekonomi e rrënuar dhe e vjedhur në një ekonomi që zhvillon e punëson.

“Kanë kaluar 20 vjet prej kur Kosova u çlirua nga okupatori i jashtëm, ama uzurpuese e brendshme, nga një klan i pangopur i njerëzve që rrjepën e gërryen pasurinë e vendit dhe buxhetin e shtetit, që e rritën qeverinë, dhe e rrudhën shtetin, që e bënë qeverinë më shumë se sa pushtet, kurse shtetin më pak sesa republikë, më 6 tetor kjo merr fund. Andaj ndër vendimet e para që do të marr në zyrë e kryeministrit do të jetë ai i reduktimit të shpenzimeve qeveritare. Kjo përfshin zvogëlimin e qeverisë, numrit të zëvendëskryeministrave, ministrave, zëvendësministrave, këshilltarëve e të tjera dhe pa shpenzimet e luksit dhe mëditjeve.” tha Albin Kurti duke shtuar se koha e pushtetit si privilegj e si biznes në kurriz të qytetarëve po përfundon dhe po vjen dita e përgjegjësisë.

“Shumë na kanë dëmtuar ekonominë dhe na e kanë rrënuar drejtësinë por më në fund erdhi dita kur ndajmë të mirën nga e keqja, të drejtin nga keqbërësi. Shumë na kanë zvogëluar popullsinë e na e kanë nëpërkëmbur dinjitetin e na e kanë prishur imazhin por erdhi dita që ata të thyejnë qafën e të kthejmë shpresën e gëzimin, e nderin për vendin.”

Kur të numërohet edhe vota e fundit e 6 tetorit, dhe ai të jetë Kryeministër, Albin Kurti premtoi njerëzit më meritor që do të udhëhein ministritë.

“Kur të numërohet edhe vota e fundit e 6 tetorit, Parlamenti do të ketë një pamje të re, ku pjesë me madhe do të jetë e mbushur me këto gra e këta burra, që sot janë pjesë e listës së fitores, listës së ndryshimit. Më falni që po i fshij djersët, por unë jam mësuar në shesh pa tavan, plus nuk po shkon vera. Pra në njërën anë ne të Vetëvendosjes do t’i japim Parlamentit njerëz të devotshëm e të ndershëm, të guximshëm e të dijshëm, e në anën tjetër do të krijojmë qeverinë më profesionale në historinë e Kosovës.”