Deputeti i Ramës merr ndihmë ekonomike/ Pasuria e tij 1.8 milionë euro…

Një deputet i parlamentit shqiptar, mik i kryeministrit Edi Rama, me një pasuri marramendëse prej 1.8 milionë euro, rezulton se merr ndihmë ekonomike.

Bëhet fjalë për ligjvënësin e PS-së në qarkun e Vlorës, Fate Velaj. Ky i fundit renditet ndër deputetët me pasurinë më të madhe, por duket se i pëlqen edhe një ndihmë ekonomike, nga ato që Edi Rama e ironizon, pothuajse në çdo takim, dhe që ka nxjerrë jashtë skemës mbi 20 mijë familje.

Rama në takimet publike shprehet se të papunët duhet të pranojnë punësimin që i siguron të ardhura deri në 8 herë më shumë se ndihma ekonomike, por në rastin konkret Fate Velaj bën përjashtim.

Emri i deputetit socialist është bërë publik nga gazetari Rezar Xhaxhiu, gjatë emisionit të mëngjesit, ku kishte të ftuar pedagogun, Erion Kristo, për të diskutuar në lidhje me ngjarjet dhe fenomenet negative që po ndodhin në vendin tone, ku ai mbetet një nga zërat kryesorë që ngreh problemet e shoqërisë.
Sipas tij, problematik është dhe brezi që po rritet në Shqipëri, ku mjafton të shikosh se si mblidhen në grupe për të vrarë njëri-tjetrin për të kuptuar situatën alarmante.

I ngacmuar nga Xhaxhiu për pasurinë prej 150 milionë eurove, të 140 deputetëve të Kuvendit të bëra publike nga “Open Data Albania”, Erion Kristo deklaroi se shumë prej tyre nuk e dinë se pse janë aty, duke nënvizuar se ka edhe të ndershëm. Por një pjesë sipas tij janë kthyer në hajdutë, që ai i krahasoi me ‘xhepistë’.

Xhaxhiu: Pasuria e deputetëve, 150 milionë euro pasuri. 360 shtëpi, Adnor Shameti i PS, 27 shtëpi, Astrit Veliaj i PD, 27 shtëpi, Tom Doshi 15, por jo vetëm kaq, ka deputetë që paguhen me ndihmë ekonomike, Fate Velaj, deputet i PS, pasuria 1.8 milionë euro dhe merr ndihmë ekonomike.
Kristo: Po çfarë të them…ka dhe deputetë që nuk vjedhin dhe nuk janë të korruptuar, ka edhe nga ata që nuk e dinë pse janë aty, një deputet në shumë raste bën një vrimë në ujë, kjo marrja e lekëve apo falsifikimi i ligjit për të marrë ato dieta të qelbëta, është katastrofë…