“Tahiri i shpëton burgut”, media franceze: Shqipëria, qendër e trafikut të drogës!
Pas vendimit të Gjykatës së Krimeve të Rënda për të lënë të lirë Ish-Ministrin e Brendshëm, Saimir Tahiri, mediat franceze duke raportuar mbi akuzat dhe vendimin e gjykatës, thekson se kemi të bëjmë me një çështje gjyqësore në Shqipëri e cila është një qendër e trafikut të drogës.
“Ka qenë një prodhues kryesor i kanabisit, veçanërisht për Italinë, edhe pse autoritetet pretendojnë se kanë arritur suksese të konsiderueshme në këtë fushë. Ministri aktual i Brendshëm Sandër Lleshaj madje tha në qershor se Shqipëria ishte jashtë hartës së vendeve që prodhojnë kanabis,” thekson e përditshmja La Figaro. Dhe jo vetëm kaq!
“Ky vend i vogël, i varfër në Ballkan është gjithashtu një pikë tranziti për heroinën dhe kokainën nga Lindja e Mesme dhe Amerika e Jugut, drogë kjo e destinuara për tregun evropian.”
Ja artikulli i plotë:
Shqipëria: Ish-Ministri i Brendshëm i shpëton burgut
Ish Ministri i Brendshëm shqiptar Saimir Tahiri, i cili u akuzua për trafik droge, i shpëtoi burgut, por u dënua dje me tre vjet shërbim prove.
Një gjykatë e Tiranës e shpalli fajtor për “shpërdorim detyrës”, por e liroi atë nga akuzat që lidhen me trafikun ndërkombëtar të drogës.
Prokuroria kishte kërkuar 12 vjet burg kundër ish aleatit të ngushtë politik të kryeministrit Edi Rama, i cili e la detyrën në vitin 2017.
Saimir Tahiri, 40 vjeç, i cili kundërshtoi të gjitha akuzat, nuk mund të mbajë postin publik gjatë tre viteve të provës. Ish-Ministri ishte i kënaqur që “gjykata e pranoi” se ai nuk ishte “kriminel, trafikant ose anëtar i një organizate kriminale” dhe njoftoi se do ta apeloi vendimin.
Emri i tij u shfaq gjatë përgjimit të bisedave telefonike, në një hetim të nisur pas arrestimit në Itali të një prej kushërinjve të tij, të dyshuar si trafikant ndërkombëtar të drogës.
Shqipëria është një qendër e trafikut të drogës. Ka qenë një prodhues kryesor i kanabisit, veçanërisht për Italinë, edhe pse autoritetet pretendojnë se kanë arritur suksese të konsiderueshme në këtë fushë. Ministri aktual i Brendshëm Sandër Lleshaj madje tha në qershor se Shqipëria “ishte jashtë hartës së vendeve që prodhojnë kanabis”.
Ky vend i vogël, i varfër në Ballkan është gjithashtu një pikë tranziti për heroinën dhe kokainën nga Lindja e Mesme dhe Amerika e Jugut, drogë kjo e destinuara për tregun evropian.
Jeta politike shqiptare është helmuar nga ky trafik, me secilën palë që akuzon kundërshtarët e saj se janë të lidhur me krimin e organizuar.
Policia shqiptare të enjten njoftoi ekstradimin e biznesmenit Arber Çekaj nga Gjermania, me dyshimin e trafikut të kokainës. Me një vlerë tregu më shumë se 180 milionë euro, kokaina u sekuestrua në shkurt të vitit 2018 në një kontejner të zbarkuar në Shqipëri nga Kolumbia, dhe që i përkiste kompanisë së Arber Çekaj.
