Kadri Veseli: Ne e fituam luftën, por ne duhet të mposhtim korrupsionin!
Kandidati për Kryeministër i PDK-së, Kadri Veseli, nga Ferizaji duke kujtuar fjalët e Presidentit Clinton me rastin e vizitës së tij të parë në Kosovë, ai sot tha se ne e fituam luftën, ne shpallëm pavarësinë, por ne duhet të mposhtim korrupsionin dhe nepotizmin.
“Jo larg nga ne këtu është një vend që njihet në Kosovë dhe krejt botën. Kampi i Bondstillit, një simbol i partneritetit tonë të fortë me Amerikën. Ne duhet t’i rikthehemi këtij partneriteti. Ne duhet t’u japim shpresë qytetarëve dhe kjo është puna ime dhe unë do ta bëj këtë,” tha Kadri Veseli duke shtuar se Kosovës sonë, të rinjve, burrave dhe grave, iu duhet përjetësisht partneriteti me Shtetet e Bashkuara.
“Në ardhjen e parë presidenti Bill Clinton tha: Ne fituam luftën së bashku, por vetëm ju mund ta fitoni paqen. Sot unë them: Ne e fituam luftën, ne shpallëm pavarësinë, por ne duhet të mposhtim korrupsionin dhe nepotizmin. Dhe ne do ta bëjmë këtë së bashku me miqtë tanë amerikanë.”
Duke iu drejtuar kryetarit Agim Aliu, Veseli premtoi se pas 6 tetorit, çdo projekt që e ka Ferizaj, çdo iniciativë do ta përkrah deri në fund.
“Kryetari e ka shumë për qejf e për zemër, por e kanë edhe të gjithë kandidatët e PDK-së për deputetë të Ferizajt. Në mandatin tjetër do ta ndërtojmë urën e hekurudhës, që do ta bashkojë qytetin e Ferizajt.”
Në fund, Kandidati për Kryeministër i PDK-së, Kadri Veseli, tha se populli duhet të zgjedhë midis një qeverie që e udhëheq PDK-ja me të si Kryeministër, e cila do të forcojë partneritetin tonë me miqtë amerikanë apo një koalicion i izolimit dhe korrupsionit, i Kurtit dhe Mustafës, që nuk do të zhvillojë ekonominë, por do të bazohet në korrupsion dhe nepotizëm.
