Pas Kolegjit Kryetarëve, Basha sot me Kryesinë dhe Grupin Parlamentar

Pas takimit me Kolegjin e Kryetarëve që u zhvillua mbrëmë, sot Kryetari i Partisë Demokratike, Lulzim Basha, ka mbledhur Kryesinë dhe Grupin Parlamentar ku Raporti i OSBE-ODIHR, Rezoluta e Bundestagut, Aksioni opozitar me struktura të riorganizuara dhe Përgatitjet pë Zgjedhje të Parakohshme janë tema të diskutimit.

“Zgjidhja e krizës janë zgjedhjet e parakohshme. Aksioni opozitar do të intensifikohet, gati për protesta. Ritmi i punës në terren duhet të rritet. Alternativa është duke u përgatitur,” mësohet të jetë shprehur Lulzim Basha ndërkohë që për protesta është bërë e qartë se do të pritet 18 Tetori, kur pritet vendimi i Këshillit Evropian për çeljen e negociatave.

Ndryshe, opozita ka dhënë propozimet e veta për zgjidhjen e krizës në vend, që kalon përmes zgjedhjeve të njëkohshme parlamentare dhe lokale të parakohshme, me qeveri tranzitore që garanton standardet për zgjedhjet e lira dhe të ndershme, dhe kjo u është bërë e qartë edhe Kryetarëve të Degëve të PD gjatë mbledhjes së Kolegjit që u zhvillua dje.