Negociatat me BE/ PE, rezolutë për çeljen e negociatave me Shqipërinë dhe Maqedoninë e Veriut

Me 412 vota për, 136 kundër dhe 30 abstenime, Parlamenti Europian, PE, ka miratuar një rezolutë për çeljen e negociatave me Shqipërinë dhe Maqedoninë e Veriut, dy shtete këto të cilat nga Samiti i fundit të BE në Bruksel morën përgjigje negative më 18 Tetor.

Përmes kësaj rezolute, nismë e 58 eurodeputetëve nga partitë popullore, socialiste dhe demokratike, Parlamenti Evropian fton vendet anëtare të Bashkimit Evropian të marrin një vendim pozitiv për çeljen e negociatave me Shqipërinë dhe Maqedoninë e Veriut

Duke shprehur zhgënjim të thellë për pamundësinë e BE për të rënë dakord për çeljen e negociatave me Maqedoninë e Veriut dhe Shqipërinë, për shkak të bllokimit të Francës, Danimarkës dhe Holandës, rezoluta thekson se kjo varros kredibilitetin e Bashkimit Europian. Madje, iniciatorët e kësaj rezolute, shprehin frikën se zgjedhjet e reja në Maqedoninë e Veriut do të ulin kredibilitetin e partive që arritën kompromis për Marrëveshjen e Prespës dhe se ndikimi i fuqive të huaja mund ta ngadalësojë ose ta bllokojë tërësisht vijimësinë e reformave.

Ndryshe, Rezolutat e Parlamentit Evropian nuk janë të detyrueshme, por shërbejnë si udhëzim i rëndësishëm politik për vendet në rrugën drejt integrimit evropian, si dhe për shtetet anëtare të BE-së.