75 vjetori i Masakrës komuniste në Tiranë, Çika: Diktatura komuniste po restaurohet, të reagojmë sa nuk është vonë!
Shoqata Antikomuniste e të Përndjekurve Politikë të Shqipërisë përkujtoi sot Masakrën komuniste të Tiranës dhe nderoi 36 martirët e 17 Nëntorit 1944.
Në këtë ceremoni mori pjesë edhe Kryetari i Partisë, Demokratike, Lulzim Basha, i shoqëruar nga Ish-Deputetë të PD-së, i cili vuri një kurorë me lule dhe takoi të gjithë familjet tiranase, që iu vranë familjarët.
Ky është një tubim, homazh dhe protestë njëherazi, tha në fjalën e tij Kryetari i Shoqatës Antikomuniste të Përndjekurve Politikë, Nebil Çika, duke konstatuar se fatkeqësisht se historia po përsëritet dhe diktatura komuniste po restaurohet.
“Në 17 nëntor 1944, ata kryen një nga aktet terroriste më të shëmtuara që ka parë e dëgjuar bota. Hodhën në erë Mauzoleun e Familjes Mbretërore ku ishte varrosur Nëna Mbretëreshë, Sadie Toptani, pikërisht aty ku ndodhet sot Parku i Madh i Liqenit,” tha Nebil Çika duke renditur shembuj të veprimeve të ngjashme të komunistëve terroristë me qeverinë aktuale ai dha edhe alarmin:
“Historia po përsëritet dhe ne po shohim me sytë tanë restaurimin e diktaturës komuniste! Diktatura është kërcënim për të gjithë ne! Reago tani që kur të vijnë te shtëpia jote, të mos jesh vetëm, e të mos jetë shumë vonë,” tha Kryetari i Shoqatës Antikomuniste të të Përndjekurve Politikë, Nebil Çika, duke i kërkuar liderit të opozitës, Lulzim Basha të marrë përgjegjësinë e plotë në përballje me komunistët në pushtet.
“Mos bëni gabimin e antikomunistëve të vitit 1944 që i toleruan komunistët dhe Shqipëria përfundoi në terrorin 75 vjeçar të komunistëve. Komunistët janë terroristë dhe opozita me standarde perëndimore nuk mjafton për ti munduar ata.”
Në emër të familjarëve të martirëve të masakrës foli zonja Karolina Kokalari e cila solli kujtimin e rrëmbimit nga shtëpia dhe ekzekutimin e babait dhe xhaxhait të sajë!
Më pas u zhvillua një Akademi Përkujtimore kushtuar Masakrës Komuniste të Tiranës ku mori pjesë Ish-Presidenti i Republikës, Bujar Nishani, Drejtori i Fondacionit Konrad Adenauer Albania, Dr.Tobias Rüttershoff dhe personalitete të njohura të jetës politike dhe shoqërore në Shqipëri dhe jo vetëm. Ligjëruesit në këtë Akademi folën përveç Masakrës komuniste të Tiranës edhe për kërcënimin dhe rikthimin e mundshëm të diktaturës komuniste me kalimin e stafetës së pushtetit nga etërit tek bijtë.
Ndryshe, ky aktivitet u zhvillua në bashkëpunim me Institutin e Studimeve të Krimeve dhe Pasojave të Komunizmit në Shqipëri, Institutin e Integrimit të të Përndjekurve Politikë dhe Shoqatës Tirana.
