Tërmeti tragjik, Rama: Kancelarja Merkel ka vënë në lëvizje mekanizmin e ndihmës në emergjencë

Pas tërmetit të fuqishëm të orës 03:54 me magnitudë 6.4 të shkallës Rihter dhe qindëra pasgoditjeve, ku numri i viktimave sa shkon dhe rritet ndërkohë vazhdojnë aksionet e kërkim-shpëtimit, Kryeministri Edi Rama ka bërë të ditur se ka marrë telefonata nga liderë të shumtë të Ballkanit dhe Europës ndërsa Kancelarja gjermane Angela Merkel ka vënë në lëvizje mekanizmin e ndihmës në emergjencë.

“Kancelarja Merkel ka vënë në lëvizje mekanizmin e ndihmës në emergjencë. Kryeministri i Maqedonisë së Veriut, Zaev, dhe Kryeministri i Bullgarisë, Borisov, shprehën gatishmërinë për të aktivizuar mekanizmat e tyre të ndihmës,” thekson Edi Rama përmes rrjetit social Twitter ndërkohë kishte informuar se se Presidenti Thaçi, i cili ka aktivizuar skuadrat speciale të FSK drejt zonave të krizës emergjente për nxjerrjen e njerëzve ende nën rrënoja, kryeministri i Malit të Zi, Markoviç, kishte nisur drejt Shqipërisë një skuadër speciale për të dëmtuarit dhe një tjetër skuadër mbështetëse edhe nga Serbia pas kishte komunikuar me Presidentin Vuçiç.

Ndryshe, pas goditjes së tërmetit të fuqishëm Kryeministri Edi Rama, duke e konsideruar një moment dramatik bënë thirrje për ruajtjen e qetësisë,të qëndrojmë pranë njëri-tjetrit e ta përballojmë këtë goditje:

” Goditja e fuqishme e tërmetit ka krijuar pasoja të rënda dhe fatkeqësisht kemi jetë të humbura. Të gjitha strukturat e shtetit janë në këmbë qysh në momentet e para pas goditjes. Punohet intensivisht për të shpëtuar çdo jetë të mundshme në disa pika fatale në Durrës e Thumanë.

Eshtë një moment dramatik ku sidoqoftë duhet të ruajmë me çdo kusht qetësinë,të qëndrojmë pranë njëri-tjetrit e ta përballojmë këtë goditje SE BASHKU. Ne do të bëjmë gjithçka kemi në dorë dhe me miqtë e mëdhenj në krah do ta kalojmë edhe këtë situatë.”