Thaçi sërish letër Kurtit: Do ta pranoni apo refuzoni mandatin!

Deri sa Kryetari i Lëvizjes Vetëvendosje, Albin Kurti, ka vazhduar përpjekjet për krijimin e koalicionit qeverisës sërish shfaqet me një letër Presidenti i Kosovës, Hashim Thaçi, duke theksuar se është në pritje të përgjigjes së tij, siç kishte premtuar në takimin e tyre konsultativ, por se ende nuk e ka pranuar propozimin e tij.

“Si President i Republikës së Kosovës jam i obliguar që të ndërmarr veprime pa vonesa të mëtejme, duke ndjekur të gjithë hapat kushtetues që qytetarët e Republikës së Kosovës ta kenë sa më shpejtë qeverinë e tyre. Duke marrë parasysh parimet demokratike, transparencën dhe korrektësinë politike, ua kam dhënë mundësinë dhe kam kërkuar në vazhdimësi që ta propozoni kandidatin/en për Kryeministër,” shprehet Thaçi duke i kujtuar Aktgjykimin e Gjykatës Kushtetuese në rastin nr. K0103/14, e cila vëren “se nuk përjashtohet që partia ose koalicioni në fjalë do të refuzojë të marrë mandatin”.

Në cilindo rast, të pranimit apo refuzimit të mandatit, Hashim Thaçi kërkon nga Albin Kurti që ta informoj në mënyrë që t’i ndërmarr të gjithë hapat e përcaktuar në Kushtetutë dhe të dekretoj kandidatin/en për Kryeministër për të formuar Qeverinë e Kosovës.