“Kirurgjia e re”/ Me Edi Ramën, Bardh Spahia: Shëndetësia me tollon!

Përurimi i godinës së re të shërbimeve kirurgjikale në QSUT, që pritet të bëhet nesër nga Kryeministri Edi Rama, për Partinë Demokratike është një flluskë sapuni në filozofinë e “tollonit”. Racionim i kujdesit shëndetësor dhe kthim pas në teknologji, e vlerëson Ish-Deputeti i Partisë Demokratike, Bardh Spahia, kalimin në godinën e re të shërbimeve kirurgjikale ku do të përfshihen klinikat 1,3 dhe Urologjia, që qeveria e propagandoi si “investim të madh”.

Nesër kryeministri ilegjitim do inaugurojë me bujë godinën e re të shërbimeve kirurgjikale në QSUT, ku përfshihen klinikat 1, 3 dhe Urologjia. Në fakt investimi “i madh” i qeverisë është një flluskë sapuni, në filozofinë e “tollonit”, pra racionimit të kujdesit shëndetësor, por edhe të kthimit pas në teknologji,” thekson Bardh Spahia në reagimin e tij përmes rrjetit social Facebook duke renditur dhe argumentat:

1.Është përgjysmuar numri i shtretërve, duke mos patur mjaftueshem shtretër as për urgjencat, e jo më për të sëmurët e planifikuar. Sa për ilustrim: nga 56 shtretër që ka patur klinika 3, numri reduktohet në 30. Kurse klinikës 1 i ulet numri i shtretërve nga 34 në 30.

2.Teknologjia pastaj është histori më vete, skandaloze. Pajisjet e përdorura janë “standard definition“ e jo „high definition“ sic është standardi modern në Europë. Burimet thonë se firmës fituese i janë dashur përpjekje titanike për të gjetur atë teknologji të viteve ’90 për kolonat e aparaturat e videolaparoskopisë, se nuk po përdoren më.

3.Nuk është menduar për ambiente të nevojshme për studentët, profesorët që të zhvillojnë mësim në këtë qendër edukuese. Për stafin mjekësor janë vetëm 4 dhoma të vogla, pra 2-3 mjekë në një dhomë. Filozofia dritëshkurtër rilindase harron faktorin kryesor, atë njerëzor.

Të gjitha këtyre mangësive, shprehet Ish-Deputeti i Partisë Demokratike, Bardh Spahia, u shtohet ajo më e madhja: rreziku kryesor i mospërmbushjes së numrit të ndërhyrjeve të planifikuara për shkak të koncesionit të sterilizimit e mungesës së fondeve, ndërsa përfundon:

“Paaftësia e kombinuar me makutërinë është rrezik fatal për qytetarët e vendin! Rama ik!”