Këshilli Politik/ “Dokumenti kompromisit”, Bylykbashi: Tani ekspertët fillojnë hartimin e Reformës…

Pas përfundimit të mbledhjes së Këshillit Politik që zyrtarizon dhe fillimin e Reformës Zgjedhore, përfaqësuesi i PD, Oerd Bylykbashi, tha se Opozita e Bashkuar e bëri të qartë qëndrimin që përputhet me prioritetet e përcaktuara nga OSBE/ODIHR, dhe tani me dokumentin e kompromisit përfaqësuesit politik dhe ekspertët fillojnë hartimin e Reformës e cila duhet të përfundoj më 15 Mars.

“Sapo u konstituua Këshilli Politik sipas dokumentit të kompromisit për fillimin e refomës zgjedhore, dokument i cili përcakton procedurën në çfarë mënyre do të ecë kjo reformë zgjedhore, e cila duhet të mbyllet brenda 15 marsit. Ky Këshill autorizon përfaqësuesit politikë dhe ekspertët që të operojnë me konsensus. Ky konsensus duhet të qendrojë deri në momentin e miratimit, siç është dakortësuar në dokumentin e kompromisit dhe ajo që ne bëmë të ditur, qendrimin e opozitës së bashkuar, i cili do të bëhet publik është prioriteti i çështjeve, që pëpruthet 100% me prioritetet që përcakton OSBE/ODIHR:

-lufta kundër shitblerjes së votës,
-presioni mbi zgjedhësit,
-presioni mbi zgjedhësit, që janë punonjës të administratës,
-abuzimi me burimet shtetërore,
-manipulimi i listave,
-keqpërdorimi i policisë së shtetit
-cënimi i sekretit të votës,
-cënimi i lirisë së votës.”

Këto janë ato çështje, thekson Oerd Bylykbashi, që Reforma do t’i trajtojë me prioritet dhe, sigurisht të trajtojë të gjitha çështjet e tjera pa asnjë përjashtim, duke patur parasysh arritjen e rekomandimeve dhe standardeve të OSBE/ODIHR-it.

“Ky dokument do t’ju bëhet publik dhe besoj që nga ky moment detyra e përfaqësuesve politikë dhe ekspertëve është të ecin shpejt me hartimin e Reformës brenda një periudhe sa më të shkurtër, brenda 15 marsit,” tha përfaqësuesi i PD në Këshillin Politik, Oerd Byltkbashi, duke shtuar se në dokumentin e kompromisit thuhet qartë se Parlamenti i Shqipërisë duhet ta miratojë atë që do të dalë me konsensus, pa asnjë ndryshim.