Presidenti Trump: Ambasadori Grenell ka bërë një punë fantastike

Presidenti i Shteteve të Bashkuara, Donald Trump, tha se I dërguari i tij për dialogun Kosovë-Serbi, ambasadori Richard Grenell, ka bërë një punë fantastike dhe se do të vazhdojë të jetë i dërguar për dialogun ndërkohë tha se do të emërojë një ambasador të ri në Gjermani.

“Do të emëroj një ambasador të ri në Gjermani. Ambasadori Grenell do të vazhdojë si i dërguar për Kosovën dhe Serbinë, pasi po bën një punë shumë të mirë. Ai i njeh mirë zyrtarët. Ka bërë punë fantastike. Do ta vazhdojë. Të gjithë thonin se ishte një marrëveshje e paarritshme, por ai e realizoi. Ishte dicka shumë pozitive për këto të dyja vende,” tha Presidenti Trump për VOA duke iu referuar marrëveshjes së fundit për rihapjen e transportit hekurudhor e rrugor Kosovë-Serbi.

Ndryshe, Presidenti i SHBA, Donald Trump e emëroi të mërkurën Ambasadorin Richard Grenell si kreun e përkohshëm të zbulimit kombëtar, ndërsa është duke kërkuar një kandidaturë për Drejtor të përhershëm.