Homazhe, Osmani dhe Kurti: Prekazi, Kryeqyteti i Kryengritjes Shqiptare!
Në 22 vjetorin e “Epopesë së UÇK-së”, Kryeministri Albin Kurti dhe kryetarja e Parlamentit, Vjosa Osmani, kanë bërë homazhe në kompleksin memorial “Adem Jashari”, në Prekaz, ku konfrimuan se Familja Jashari e ka vulosur shtetësinë e Kosovës.
Kryeministri Albin Kurti, tha se familja Jashari e ka vulosur Prekazin si kryeqytet të kryengritjes shqiptare.
“Për të bërë homazhe të varret e Jasharajve, të kësaj familje që e ka vulosur Prekazin si kryeqytet të kryengritjes shqiptare. Ne e kemi obligim e borxh të përhershëm e të përjetshëm ndaj Jasharajve dhe këtë do të mund ta shlyejmë vetëm me punë të përditshme për shtetndërtim, për zhvillim dhe për drejtësi,” tha Kryeministri Albin Kurti.
Ndërkaq, kryetarja e Parlamentit të Kosovës, Vjosa Osmani, tha se çdo ditë duhet të përk ujtohet sakrifica e familjes Jashari që i ka vendosur themelet e shtetit të Kosovës.
“Jo vetëm në këto data, por në çdo ditë dhe në çdo moment ta përkujtojmë këtë sakrificë e cila i ka vënë themelet dhe ato themele jashtëzakonisht të forta të shtetit tonë. Në të njëjtën kohë ka ndërkombëtarizuar çështjen e Kosovës duke e bërë të ditur para syve të botës demokratike se populli shqiptar ishte një popull i shtypur nga ana e regjimit totalitar serb,” tha Kryetarja e Parlamentit të Kosovës.
Albin Kurti dhe Vjosa Osmani kanë vizituar edhe Kullën e Familjes Jashari, ku janë pritur nga Rifat Jashari, vëllai i komandantit legjendar Adem Jashari.
