Koronavirusi, tesimi i të dyshuarëve, Bino: 60% nga Tirana!
Shefja e Departamentit të Epidemiologjisë dhe Kontrollit të Sëmundjeve Infektive në Institutin e Shëndetit Publik, Silva Bino, sot tha se nuk asnjë rast me koronavirus ndërsa nga rastet si të dyshuar që janë testuar, 60% janë nga Tirana, vijon me Durrësin, Vlorën, Fierin, Shkodrën, Elbasanin e Lushnjën.
“Rast i dyshuar quhet kur ne fillojmë hetimin për to se kemi një dyshim që mund të jenë të prekur. Ne kemi zgjeruar edhe përkufizimin e rastit dhe po testojmë jo vetëm raste që kanë shenja respiratore dhe histori udhëtimi, por edhe raste të cilat kanë shenja të sëmundjes së rëndë respiratore akute që kërkojnë hospitalizim dhe që nuk kanë një shkak tjetër që të shpjegojë këtë sëmundje. Rastet e testuara i përkasin kryesisht Tiranës 60% e rasteve, Shkodrës, Durrësit, Fierit, Lezhës dhe Vlorës”, tha përfaqësuesja e Task Force Silva Bino e bindur se ISHP ka të gjitha kapacitetet laboratorike në për të kryer diagnozën e COVID-19.
“Ne kemi kapacitetet tona në Laboratorin e ISHP-së ku kryhen të gjitha ekzaminimet e nevojshme dhe të besueshme. Theksoj se ne i kryejmë ekzaminimet tona duke pasur një kontroll pozitiv i cili vjen nga i njëjti ofrues, Instituti Paster dhe Arkiva Europiane e Viruseve. Pra kur del kontrolli pozitiv, po të jetë dhe mostra pozitive do të dalë menjëherë aty.”
“Në 24 orët e fundit në te gjitha pikat kufitare në total kanë hyrë 20,339 udhëtarë, të cilët janë vlerësuar, mbështetur në survejancën e përforcuar për monitorimin e temperaturës. Në 24 orët e fundit në nr. 127 ka patur 1727 thirrje, nga të cilat 41 prej tyre janë vlerësuar në lidhje me infeksione virale respiratore dhe histori udhëtimi me Italinë. Ministria e Shëndetësisë dhe Mbrojtjes Sociale rekomandon për udhëtarët që kanë udhëtuar nga rajonet eprekura me shpërthime komunitare dhe që kanë patur kontakte me persona të sëmure apo të dyshuar për COVID19 të vetëkarantinohen për një periudhë 14 ditore. Si dhe rekomandon qytetaret që kanë udhëtuar në vendet e prekura dhe kanë shenja të infeksionit viral respirator të telefonojnë 127 për të marrë udhëzimet e duhura se si duhet të veprojnë mbështetur në gjendjen e tyre shëndetësore,” tha Shefja e Departamentit të Epidemiologjisë dhe Kontrollit të Sëmundjeve Infektive në Institutin e Shëndetit Publik, Silva Bino, duke e bërë të qartë se janë përcaktuar protokollet e menaxhimit klinik të rasteve, është identifikuar se çfarë duhet bërë më tej, janë përcaktuar spitalet ku do të trajtohen rastet si dhe është koordinuar puna paraprake për trajtimin e rasteve të tjera që kanë këto spitale, por ajo sërish bëri apel për bashkëpunimin nga ana e qytetarëve për rritjen e masave higjieno-sanitare.
