Koronavirusi në Shqipëri, ja cila është gjendja e 6 të prekurëve…
Përpara Spitalit Infektiv në QSUT, ku tashmë janë 6 raste të konfirmuara me koronavirus dhe ka dyshime për të tjerë, ka një perimetër sigurie pasi është kthyer në karantinën e parë të Covid 19 në Shqipëri.
Sipas të dhënave të fundit, dy rastet e para, pacienti zero 28 vjeçar dhe babai i tij, së bashku me tre anëtarë të tjerë të familjes së tyre, si dhe një 31 vjeçar tjetër nga Tirana, që po mbahen në këtë karantinë, nuk kanë komplikacione, pra, nuk kanë nevojë të intubohen e mbahen në reanimacion. Por, spitali infektiv është zbrazur nga pacientët e tjerë dhe është bërë gati për raste të tjera të mundhsme të prekur nga ky virus.
Brenda ambienteve të këtij spitali lejohet vetëm personeli mjekësor, të pajisur me maska e veshje të posaçme ndërkohë nuk ka asnjë informacion për çiftin nga Skrapari të paraqitur mbrëmjen e djeshme në dyert e këtij spitali, me simptoma të ngjashme me Covid 19.
Edhe 14 të dyshuar
Ndërkohë që është regjistruar i prekuri gjashtë, 31-vjeçari me banim në Tiranë që kishte një histori udhëtimi në Milano 6 ditë më parë dhe është kthyer pas një qëndrimi të shkurtër 1-ditor në vendin fqinj, janë testuar dhe 14 raste të dyshuara:
“Gjatë ditës së sotme janë testuar edhe 14 raste të dyshuara për COVID-19, tetë prej të cilëve persona të kontaktit të ngushtë me dy rastet e konfirmuara me koronavirusin e ri në vendin tonë. Nga rezultatet e 14 testimeve të kryera në Laboratorin e Virologjisë në Institutin e Shëndetit Publik, rezulton se 4 persona kanë dalë pozitivë për COVID-19, 3 prej të cilëve persona të familjes me 2 rastet e para që u konfirmuan mbrëmjen e djeshme. Aktualisht, të gjithë personat e tyre të kontaktit po mbahen në vetëkarantinim të detyruar dhe po ndiqen nga ekipet e epidemiologëve për gjendjen e tyre shëndetësore,” bënë të ditur ministria e Shëndetësisë dhe për momentin, gjendja e tyre rezulton pa probleme të veçanta. Deri tani janë testuar 77 raste dhe numri i atyre që kanë rezultuar pozitivë për COVID19 është 6.
Ndryshe, dje ministrja e Shëndetësisë, Ogerta Manstirliu, urdhëroi që të gjithë shtetasit që hyjnë në Shqipëri nga zonat me rrezikshmëri të lartë nga koronavirusi COVID-19, të vetëkarantinohen për një periudhë 14-ditore. Urdhri i nxjerrë dje, pas dy rasteve të para në Shqipëri, synon parandalimin e përhapjes së virusit, ndaj ministrja e Shëndetësisë paralajmëron edhe gjobë deri në 1 milion lekë të vjetër, për ata të cilët thyejnë urdhrin.
“Të gjithë shtetasit që hyjnë në territorin e Republikës së Shqipërisë dhe që vijnë nga zona e izoluar në Itali, të vetëkarantinohen për një periudhë 14-ditore në ambientet e banesave të tyre si një masë parandaluese për mospërhapjen e infeksionit të shkaktuar nga COVID-2019. Strukturat shëndetësore sigurojnë mbikëqyrjen e vazhdueshme të të gjithë personave të identifikuar si persona që kanë hyrë në vendin tonë nga zona e izoluar në Itali. Moszbatimi i këtij urdhri nga personat që hyjnë në Shqipëri nga zona e izoluar në Itali është i dënueshëm sipas dispozitave të nenit 35 të Ligjit nr 15/ 2016, ‘Për parandalimin dhe luftimin e infeksioneve dhe sëmundjeve infektive’”, thuhet në urdhrin e Ministrisë së shëndetësisë.
Ndërkaq, ligji për parandalimin dhe luftimin e infeksioneve parashikon gjobë deri në 1 milion lekë për mosrespektuesit e ligjit.
“Mosraportimi i sëmundjeve infektive, sipas përcaktimeve të bëra në nenin 5 të këtij ligji, dënohet me gjobë në masën 100 000 lekë. Refuzimi për vendosjen nën mbikëqyrje shëndetësore, sipas përcaktimeve të pikës 1 të nenit 17, dënohet me 5.000 (pesë mijë) lekë, për personin objekt i mbikëqyrjes shëndetësore, dhe 100.000 (njëqind mijë) lekë për punëdhënësin e personit objekt i mbikëqyrjes shëndetësore, moszbatimi i kalendarit të vaksinimit të detyrueshëm, mosregjistrimi i personave që duhen vaksinuar, mosmbajtja në kushte i ‘zinxhirit të ftohtë’ të vaksinave, korrigjimi i dokumenteve të vaksinimit, sipas përcaktimeve të bëra në këtë ligj dënohen me gjobë nga 100.000,″ sanksionohet në ligjin për parandalimin e infeksioneve.
