Pas propozimit të Bashës/ Vendimi, Qeveria: Dy javë leje për njërin nga prindërit!

Pas mbylljes së shkollave, kopshteve dhe çerdheve nga Qeveria, pushim do t’i jepet në datat 10-23 mars edhe njërit nga prindërit kujdestarë të fëmijëve që ndjekin çerdhet ose arsimin parashkollor dhe janë nëpunës të administratës publike.

Madje, përmes këtij vendimi Qeveria i bënë thirrje edhe punëdhënësve privatë:

“Për shkak të mbylljes së çerdheve dhe institucioneve arsimore, në funksion të marrjes së masave për parandalimin e përhapjes së infeksionit nga COVID-19, iu bëjmë thirrje të gjithë punëdhënësve privatë që të gjejnë mundësitë për trajtimin me pushim të punëmarrësve të tyre, sipas pikës 1, të këtij vendimi”, thuhet në vendimin e qeverisë, që mban firmën e kryeministrit Edi Rama.

Ndryshe, pas vendimit për mbylljen e shkollave, kopshteve dhe çerdheve, dje Kryetari i Partisë Demokratike, Lulzim Basha, bëri thirrje tashmë atë që është jetësuar në Vendim të Qeverisë:

“Pas vendimit për mbylljen e shkollave, kopshteve dhe çerdheve, duhet që shteti të paguajë apo kompensojë me vlerë të plotë një nga prindërit në marrëdhënie pune që duhet të kujdeset për fëmijët e vegjël gjatë kohës që çerdhet, kopshtet dhe shkollat qëndrojnë të mbyllura.”