Situatë dramatike në Kroaci, Zagrebi dhe Beogradi frikë nga skenari italian
Në Kroaci situata është dramatike ndërkohë ministri i Shëndetësisë, Vili Berosh i shqetësuar për mosrespektimin e masave për parandalimin e përhapjes së koronavirusit ka frikë nga skenari italian ashtu si dhe Presidenti i Serbisë, Aleksandar Vuçiç ndërsa në Bosnje Hercegovinë është shënuar viktima e parë.
Shtabi Kombëtar i Mbrojtjes Civile të Kroacisë raporton se brenda 24 orëve janë testuar 2.100 persona dhe pozitiv kanë rezultuar 78 persona duke eçuar kështu në 206 numrin e të prekurve me koronavirus në shtetin kroat.
“Në Kroaci kemi 206 të infektuar, që është 49 më shumë nga mëngjesi dhe 78 më shumë për 24 orë,” tha Ministri i Shëndetësisë, Vili Berosh, duke folur për një situatë dramatike e cila sipas tij e ndanë Kroacinë vetëm 19 ditë nga skenari italian ndërkohë shumë qytetarë nuk po i respektojnë masat e qeverisë kundër përhapjes së koronavirusit.
“Rekomandohet që të dalim jashtë në ajër të pastër, por të mos kemi kontakte të afërta,” tha Berosh i cili tha se në vetëizolim duhet të shkojnë ata që ishin në kontakt me të infektuarit dhe ata që vijnë nga vendet që janë prekur nga koronavirusi.
Për 24 orë në Mal të Zi nuk është shënuar asnjë rast i ri nga koronavirusi ndërkohë janë kryesr 12 testime.
“Sapo është kryer analiza e 12 testeve. Që të gjithë kanë rezultuar negativ. Në Mal të Zi kemi gjithsej 14 të prekur me koronavirus,” bënë të ditur Instituti i Shëndetit Publik ndërsa nën mbikëqyrje janë 5.156 persona.
Nga Bosnje Hercegovina vjen lajm i keq, atje është shënuar edhe viktima e parë. Fjala është për një grua të moshuar nga Bihaçi e cila vuante edhe nga sëmundje tjera kronike. Aktualisht në Bosnje Hercegovinë janë 93 të prekur me koronavirus.
Në Serbi janë raportuar 22 raste të reja duke e çuar në 171 numrin e të prekurve me koronavirus. Kjo ka bërë që Presidenti i Serbisë të ndryshoj regjimin e lëvizjes dhe nga nesër ndalimi qarkullimi do të jetë nga ora 17 deri në 5 mëngjesit. “Popull, rrini në shtëpi dhe ruani jetët tuaja. Në veçanti pensionistët, rrini në shtëpi. Lus sipërmarrësit privat, mos i largoni njerëzit nga puna aq lehtë, do t’iu ndihmojmë, nuk mund të premtoj atë që nuk mund të bëjmë, por një pjesë të humbjes do ta marrim ne përsipër dhe një pjesë merreni ju,” tha Vuçiç duke bërë të ditur se të enjten farmacitë serbe do të furnizohen me 15 milionë maska, ndërsa sonte mbërrin avioni i parë me ndihma nga Kina. Gjithashtu, tha ai, edhe sheiku Muhamed bin Zajed po bënë gati një ndihmë humanitare për Serbinë ndërsa përsëriti apelin për qytetarët që të rrinë në shtëpi që mos ndodhë skenari italian.
