Në Kosovë konfirmohet viktima e parë, 31 raste të prekur me koronavirus

Në Kosovë sot u konfirmua viktima e parë nga koronavirusi ndërsa të prekur me COVID-19 janë 31. Instituti Kombëtar i Shëndetit Publik, IKSHPK, njoftoi se viktima është një burrë 82 vjeç nga Dumnica e Podujevës.

“Pacienti i lindur më 1938, fshati Dumnicë, Komuna e Podujevës, është pranuar në Klinikën Infektive më 16.03.2020, në ditën e 6 të sëmundjes me shenja të infiltrimit pulmonar dhe pneumonisë masive majtas,” thuhet në njoftimin e IKSHPK duke saktësuar se pacienti ka pasur edhe sëmundje shoqëruese kronike: kardiake dhe sëmundje kronike mushkërore.

Nërkohë Ministri i Shëndetësisë i Kosovës, Arben Vitia, raporton RFE, ka kërkuar nga kryeministri i Kosovës, Albin Kurti, që t’i propozojë Qeverisë masa shtesë kundër koronavirusit, me qëllim të mbrojtjes së shëndetit publik.

“Këto masa do të diskutohen sot edhe me ministritë e linjave dhe do paraqiten në mbledhjen e Qeverisë. Të gjitha këto masa do të shpjegohen saktë për qytetarët pasi të kenë marrë miratimin,” tha Arben Vitia.

Ndryshe, javën e kaluar Kosova ka shpallur gjendje emergjente për shëndetin publik, për shkak të situatës së krijuar me koronavirus. Në kuadër të masave të ndërmarra janë mbyllur shkollat, kafiteritë, parqet, janë pezulluar disa linja tokësore dhe ajrore e të tjera.

Në Kosovë aktualisht janë 31 raste të konfirmuara me koronavirus.