Testimi në masë i COVID-19, Apeli Voltana Ademit: E vetmja mënyrë për të frenuar infeksionin!
Kryetarja e Bashkisë së Shkodrës, Voltana Ademi, duke shprehur shqetësimin për situatën e krijuar nga COVID-19 në Shkodër, apeloi te institucionet që të rrisin urgjentisht dhe në masë sa më të madhe testimet si e vetmja mënyrë për të frenuar infeksionin.
“Fatkeqësia shumë e madhe është që kjo çështja e bashkëpunimit të ndërsjellë është bërë si një bombë e madhe që do shpërthejë pandeminë. Tani, kjo është shumë e rëndë edhe të vazhdohet të trumbetohet mendoj se është e pavend. Ajo që ka munguar në Shkodër dhe po e ritheksoj, lidhet me faktin e një mungesës së një përgjegjësie për t’ju qasur nevojës së domosdoshme, për t’ju përgjigjur asaj që ka qenë ekzigjente dhe domosdoshmëri në Shkodër. Nëse unë kam thënë kujdes spitalin, kujdes protokollin e shtrimeve në spital. Nëse unë kam thënë të rritet numri i testimeve, në fakt tani po rritet numri i testimeve në krahasim me përpara,” tha kryebashkiakja Voltana Ademi.
Me këtë rast Kryetarja e Bashkisë Shkodër ka denoncuar raste të shumta kur familjeve që kanë kërkuar tu bëhet testi për koronavirusin janë refuzuar nga instucionet përgjegjëse shëndetësore.
“Unë jam e bindur dhe ka denoncime në Shkodër që janë familje të tëra në shtëpi, që nuk e kanë pasur të mundur t’u bëhet testi apo që kanë raportuar te 127 dhe nuk u është bërë testi. Prandaj, ky çekani që bie nuk ka lidhje me bashkëpunimin, por me nevojën që duhet të merren përgjegjësi, që nuk mund t’u lihen vetëm njerëzve për t’iu kërkuar që të izolohen. Kjo është një masë që tregon se shteti nuk ekziston dhe shteti nuk të përgjigjet në testim,” tha Kryetarja e Bashkisë Shkodër, Voltana Ademi, duke apeluar te institucionet që të rrisin urgjentisht dhe në masë sa më të madhe testimet.
“Që nga data 28 shkurt dhe deri në 6 prill mua më është raportuar se janë 168 testime. 6 prilli jemi para dhjetë ditësh dhe sot niveli i testimeve është 467 në Shkodër. Kjo është një indikator i vogël, por që tregon se me rritje e testimeve do të identifikoheshin të gjitha ata që ishin të sëmurë.”
