Kroacia zgjat izolimin për shkak të koronavirusit

Kroacia njoftoi sot se do të zgjasë izolimin për shkak të koronavirusit edhe për 15 ditë të tjera. Ministri i Brendshëm kroat, Davor Bozhinoviq, tha se masat e izolimit do të vazhdojnë deri më 4 maj.

Ai tha se qeveria po i shqyrton edhe planet për rihapjen e ekonomisë, por duke i mbajtur njerëzit të sigurt.

Kroacia, raporton RFE, ka regjistruar mbi 1.800 raste me COVID-19, sëmundjen që e shkakton koronavirusi.

Tridhjetenëntë pacientë kanë humbur jetën.

Ndryshe, autoritetet kroate i kanë mbyllur dyqanet, baret, restorantet, shkollat dhe transportin publik një muaj më parë. Vetëm dyqanet ushqimore, barnatoret dhe stacionet e benzinës kanë mbetur hapur.