Pas deklaratës së Kryeministrit/ Reagon opozita, Këshilli Politik i Reformës Zgjedhore humb kuptimin!
Pasi Kryeministri Edi Rama e bëri të qartë dje se për Reformën Zgjedhore nuk kanë rëndësi propozimet e opozitës por rekomandimet e OSBE/ODIHR kanë reaguar dy përfaqësuesit e opozitës në Këshillin Politik ndonëse prania e tyre në këtë organizëm të Reformës Zgjedhore më nuk ka kuptim.
“Është e qartë se ky qëndrim publik i kryeministrit është një provokim i rëndë për Këshillin Politik, që minon frymën e konsensusit. Këshilli politik nuk është as zyrë dhe as paradhomë e kryeministrit. Ky kryeministër me rekorde tepër të rënda në manipulimin dhe kriminalizimin e zgjedhjeve në Shqipëri nuk ka asnjë interes për të mbështetur propozimet e opozitës, që pastrojnë zgjedhjet nga shitblerja dhe kriminalizimi. Nuk mendoj se OSBE – ODIHR janë noterizuesit e propozimeve të njëanshme provokative dhe antikosensuale të Kryeministrit,” thekson Nënkryetari i LSI, Petrit Vasili përfaqësues i opozitës në Këshillin Politik me të cilin është dakord edhe Oerd Bylykbashi i Partisë Demokratike.
“Vija të kuqe si këto që ka vënë sot Kryeministri Rama në lidhje me dy nga çështjet e nxehta të Reformës Zgjedhore, kur sjellja e tij ka rënduar pikërisht ato fusha problematike, jo vetëm janë krejt pa bazë në rekomandimet e ODIHR, por minojnë qëllimisht procesin politik të Reformës, pikërisht në momentin e rinisjes së saj.
Këto qëndrime tregojnë qëllimin e mazhorancës për të ecur drejt ndryshimeve të njëanshme në Kod, pas minimit të punës së Këshillit Politik apo akoma më keq, duke shkelur dokumentin e kompromisit të janarit 2020, mbi të cilin bazohet reforma, ndryshimet konsensuale të Këshillit mund të ndryshohen me votën e mazhorancës në Kuvend, pavarësisht angazhimit për mosndryshim të këtyre amendamenteve,” thotë reagimin e tij përfaqësuesi i PD në Këshillin Politik, Oerd Bylykbashi, duke përsëritur parime evropiane që dihen por jo kur ke punë me Edi Ramën:
“Konsensusi politik është themeli i kushtit të BE për reformën nga Këshilli dhe Kryeministri me këto qëndrime vë në pikëpyetje përpjekjet për konsensus që duhet të udhëheqin punën e Këshillit Politik në tre javet në vijim, deri në afatin e dakordësuar të 31 majit.”
Kështu, derisa dy ditë më parë çështje ishte nëse do të përmbyllet dhe si do të përbyllet Refroma Zgjedhore deri më 31 Maj, Kryemnistri Edi Rama e “përmbylli” qysh dje duke e bërë të qartë se diskutimet dhe propozimet e opozitës në Kshillin Politik janë kot ndërsa hodhi poshtë propozimin e opozitës për qeveri tranzitore, si dhe vendosi vija të kuqe për çështje që janë ezaururar në Këshill me qëllim të zhvlersimit të punës së Këshillit Politik dhe Reformës Zgjedhore.
