Menaxhimi i krizës/ Me Dhomën e Tregtisë, Basha: Dështimi më i madh i Ramës!

Menaxhimi i pandemisë dhe krizës ekonomike është dështimi më i madh i Edi Ramës, konstaton Kryetari i Partisë Demokratike, Lulzim Basha, në takim me krerët e Dhomës së Tregtisë dhe Industrisë Tiranë ku u diskutua për krizën ekonomike pas pandemisë COVID-19 dhe për alternativat e opozitës për rimëkëmbjen e ekonomisë shqiptare.

“Përfaqësuesit e Dhomës së Tregtisë dhe Industrisë Tiranë shprehën shqetësimin se Paketa 1 dhe 2 të ndërmarra nga qeveria kanë qenë joefektive dhe me një ndikim të papërfillshëm tek biznesi. Masa e financimit është shumë e ulët ndërsa pengesat burokratike i kanë bërë ato të pazbatueshme. Si rrjedhojë, sot në kohë emergjence financimi i ekonomisë është inekzistent, ndërsa sektorë si biznesi prodhues, turizmi, bujqësia dhe transporti mbeten ende pa asnjë mbështetje,” tha Lulzim Basha pas takimit ndërsa për dështimin e Edi Ramës në menaxhimin e pandemisë dhe krizës ekonomike shtoi:

“Fatkeqësisht, këto dështime po i kushtojnë shumë shtrenjt shqiptarëve dhe ekonomisë së tyre që sot po varfërohen edhe më shumë. Partia Demokratike propozoi masa konkrete mbështetëse për biznesin vendas dhe për të punësuarit e tij por Rama zgjodhi ti harxhojë lekët e buxhetit të shtetit për një grusht oligarkësh dhe jo për njerëzit. Ai është sot e keqja më e madhe për vendin.”

Opozita, tha Kryetari i Partisë Demokratike, Lulzim Basha, ka një plan konkret për rimëkëmbja ekonomike të vendit dhe rritjen e punësimit të shqiptarëve, ndërsa përfundoi:

“ky është është prioriteti absolut i progranmit tonë ku përveç ndihmës financiare për të kapërcyer krizën ne do të ofrojmë edhe instrumentat dhe financimin e duhur për ekonominë prodhuese, uljen e taksave, luftën ndaj monopoleve dhe klientelizmit, si dhe mbështetjen dhe financimin e projekteve madhore ekonomike që do krijojnë punësim dhe mirëqënie për shqiptarët.”