Kosova rihap kufijtë tokësorë

Pas vendimit që mori mbrëmë Qeveria e Kosovës, sot u rihapën kufijtë tokësorë që ishin mbyllur qysh më 13 mars, për të parandaluar përhapjen e koronavirusit.

Qendra Kombëtare për Menaxhim Kufitar konfirmoi se janë rihapur kufijtë në Vërmicë, Kullë, Hani i Elezit, Merdarë, Jarinë dhe Dheu i Bardhë.

Autoritetet vendosën që të gjithë personat që hyjnë në territorin e Republikës së Kosovës dhe posedojnë rezultate negative për testin e koronavirusit – jo më të vjetra se katër ditë – të mos u nënshtrohen procedurave të vetizolimit, raporton RFE duke shtuar se ata që nuk posedojnë testin, detyrohen të vetizolohen për shtatë ditë.

Përveç fluksit të madh të automjeteve që është vënë re nga Kosova në Shqipëri, raprtohet se drejtuesit e kamionëve që kanë lëvizur nga Shqipëria në drejtim të Kosovës u duhet të paguajnë 22 euro për dezinfektimin e mjetit.

Ndryshe, në Kosovë janë konfirmuar gjithsej 1.083 raste me koronavirus. Prej tyre 843 janë shëruar, ndërsa 30 kanë vdekur.

Kosova ka nisur lehtësimin e masave të izolimit me faza qysh më 4 maj.