Me Pronarët, Basha: Një Projektligj që do ta zëvendësojë atë kriminal të Edi Ramës!

Kryetari i Partisë Demokratike, Lulzim Basha, pas takimit me Shoqatën e Pronarëve tha se u dakordësuan për të hartuar një projekt të qartë të një projektligji që do të zëvendësojë korpusin kriminal të projektligjeve në lidhje me pronën, të miratuar nga qeveritë Rama.

“I gjithë korpusi ligjor dhe veprimet e qeverisë Rama, kanë qenë kundër pronës private dhe në shërbim të planeve korruptive të biznesmenëve të lidhur me të, pjesë e të cilit është edhe ligji i investimeve strategjike në vitin 2015. Sikundër dhe ligji i ri i pronave i cili e trajton pronën private të individit si një mall në shportën e oligarkëve pa pasur respekt për shenjtërinë e pronës dhe zotëruesit e saj,” tha Lulzim Basha duke pranuar përgjegjësitë e PD në të shkuarën për këtë çështje, ndërsa siguroi përfaqësuesit e Shoqatës së Pronarëve se qeveria e ardhshme do të mundësojë një zgjidhje përfundimtare sipas standarteve europiane për pronarët, gjithmonë në konsultim me ta.

“Së bashku me ta u dakordësuam për të hartuar një projekt të qartë dhe gjithashtu piketat kyçe të një projektligji që do të zëvendësojë korpusin kriminal të projektligjeve në lidhje me pronën, të miratuar nga qeveritë Rama,” tha lideri i opozitës pas takimit me Shoqatën e Pronarëve.

Nën koordinimin e zonjës Ledina Mandia, tha Kryetari i Partisë Demokratike, Lulzim Basha, PD do të ndihmojë dhe do të ideojë së bashku me Shoqatën e Pronarëve një korpus ligjor që do të përpiqet të japë zgjidhjen e duhur për pronën në Shqipëri ndërsa përfundoi:

“Qeveria Rama nuk ka interes raportin e drejtësisë dhe të së drejtës së tyre. Përkundrazi, ajo ka interes vetëm një grusht individësh që përfitojnë në kurrizin e pronarëve.”