KPK e shkarkon, Fatmira Hajdari: Vendim i pritshëm!

Komisioni i Pavarur i Kualifikimit ka shkarkuar Gjyqtaren e Gjykatës së Apelit të Tiranës, Fatmira Hajdari. Pas vendimit të KPK, vetë gjyqtarja tha se vendimi ishte i pritshëm ndërsa avokati i saj Maks Haxhia tha se vendimi do të ankimohet.

 KPK ka vendosur të shkarkojë nga detyra Hajdarin për shkak të problemeve me deklarimin e pasurisë. KPK vlerësoi se Fatmira Hajdari nuk ka deklaruar një truall në vitin 2015. “887m2 truall, nuk e ka deklaruar në 2013, 2015 dhe në deklaratën e vettingut. Tre njësi dhe 12 apartamente te Vilat Gjermane, 207.400 euro, pasuria në total. Ka mospërputhje të deklarimit të një apartamenti në deklarimet e vitit 2003 dhe në deklaratën vetting”.

Gjatë procesit të kontrollit të figurës, DSIK doli në konkluzionin se Fatmira Hajdari ka bërë deklarim të pasaktë në formularin e vetëdeklarimit, duke fshehur faktin se i është revokuar viza amerikane.

Ndryshe, Fatmira Hajdari është bashkëshortja e liderit të lëvizjes studentore 1990-1991, Azem Hajdari, dhe nëna e deputetes, Rudina Hajdari.