Dita e Pavarësisë, Yuri Kim: SHBA do vijojnë të qëndrojnë krenare krah jush!

Me rastin e Ditës së Pavarësisë së Amerikës, Ambasadorja e SHBA në Shqipëri, Yuri Kim, vjen me një mesazh të veçantë kur festimi i kësaj dite këtë vit nuk është si asnjë tjetër për shkak të pandemisë ndërsa siguroi se Shtetet e Bashkuara do të qëndrojnë me shqiptarët sot e nesër, si aleatë të fortë të lirë dhe të vendosur për të formuar një bashkim të përsosur.

“Për herë të parë po përballemi me një pandemi, e cila nuk na ka lënë të mblidhemi në një çati për të festuar ditëlindjen e 244-rt të Shteteve të Bashkuara të Amerikës. Ndërsa duhet të qëndrojmë të distancuar fizikisht, ne amerikanët dhe shqiptarët , jemi po aq afër dhe të bashkuar si gjithmonë. Mbetemi të lidhur nga dashuria dhe mbrojtja e lirisë sonë, e pavarësisë sonë dhe e vizionit tonë të përbashkët për të ardhmen.”

Në këtë ditë të bekuar nga Zoti s’ka se si të mos përmesnden 52 fjalët magjike:

“Më 17 shtator 1787, anëtarët e Konventës Kushtetuese nënshkruan draftin përfundimtar të Kushtetutës së SHBA-së. 52 fjalët e para të këtij dokumenti, në hyrjen e tij, janë disa nga më të fuqishmet në historinë amerikane. Ato thonë: Ne populli i Shteteve të Bashkuara , me qëllim që të krijojmë një bashkim më të përsosur, të vendosim drejtësinë , të sigurojmë qetësinë në vend, të sigurojmë mbrojtjen e përbashkët, të nxisim mirëqenien e përgjithshme dhe të sigurojmë bekimet e lirisë për veten tonë dhe pasardhjen tonë, caktojmë dhe vendosim këtë Kushtetutë të SHBA-së,” tha Ambasadorja Yuri Kim dhe për dy shekuj e gjysmë Amerika ka ndjekur atë ëndërr për të formuar një bashkim më të përsosur.

“Sipërmarrja jonë demokratike ka arritur sukses në një mënyrë unike dhe të pashembullt në historinë e njerëzimit. SHBA kanë përdorur fuqinë e tyre për të sjellë paqe dhe begati më të madhe, jo vetëm për popullin amerikan , por edhe për botën. Historia e Amerikës është vërtetë një histori unike suksesesh. Sukses që nuk përcaktohet nga mungesa e dështimeve apo gabimeve, por nga vendosmëria jonë për t’u përballur me çdo dështim dhe gabim dhe për të bërë më të mirën. Me fjalë të tjera vendosmëria jonë për t’u përpjekur që gjithmonë të formojmë një bashkim më të përsosur. Dhe i tillë është rasti me miqësinë midis Shqipërisë dhe SHBA-së,” tha Ambasadorja amerikane, Yuri Kim duke përfunduar këtë mesazh pikërisht për këtë miqësi, fuqinë e saj, pse SHBA dhe Shqipëria kanë zgjedhur të jenë pranë njëra tjetrës, aty ku Shtetet e Bashkuara do qëndrojnë si sot dhe nesër, të vendosur për të formuar një bashkim të përsosur:

“Njëqind vjet më parë SHBA përdorën fuqinë e tyre për të mbështetur një Shqipëri të pavarur, e shtruan rrugën që ju t’i bashkoheshit Lidhjes së Kombeve në 1920.

Presidenti amerikan punoi për të promovuar mirëqenien e përgjithshme të shqiptarëve në mënyrë që ata të gëzonin bekimet e lirisë.

Për të siguruar një mbrojtje të përbashkët, Shqipëria u anëtarësua në NATO në vitin 2009.

Që prej asaj kohe, Shqipëria ka qenë një partner i besueshëm për sigurinë e rajonit.

SHBA do vijojnë të qëndrojnë krenare krah jush, ndërsa zgjerojmë dhe thellojmë marrëdhëniët tona të mbrojtjes dhe e bëjmë Shqipërinë një aleate më të fortë dhe më të aftë.

Në vitin 2016, kur Kuvendi miratoi njëzëri reformën në drejtësi, vendi hodhi hapat e parë drejt vendosjes së drejtësisë së re në Shqipëri, për të çrrënjosur korrupsionin, për të ndjekur penalisht krimin e organizuar dhe për të vendosur me vendosmëri sundimin e ligjit.

Ky është një proces që kërkon kohë dhe përpjekje, për të sjellë rezultate. Por si gjithmonë SHBA do vazhdojnë t’ju mbështesin.

Sot, Shqipëria është në rrugën drejt një bashkimi tjetër, BE!

Reformat e nevojshme për këtë do të sjellin më shumë drejtësi dhe begati për popullin shqiptar.

SHBA ishin me ju në fillim të këtij procesi dhe ne do qëndrojmë me ju deri sa të arrini synimin tuaj.

Historia ka treguar që në momente të vështira, SHBA dhe Shqipëria kanë zgjedhur të jenë pranë njëra tjetrës, krahë për krah. Qëndrojmë me ju sot e nesër, si aleatë të fortë të lirë dhe të vendosur për të formuar një bashkim të përsosur.”