Memoriali i Holokaustit në Tiranë, Yuri Kim: Shpëtimi i qindra hebrenjve, histori frymëzuese e besës shqiptare

Sot në Tiranë u përurua Memoriali për Holokaustin. Nuk kanë shumë vende apo popuj që kanë një memorial të tillë, tha me këtë rast Ambasadorja e SHBA në Tiranë, Yuri Kim, por Shqipëria sot e ka për shkak të qëndrimin që mbajti për të mbrojtur 80 vite më parë hebrenjtë kundër pushtimit nazist.

”Nuk mendoj që ka shumë vende dhe shumë popuj në botë që të kenë një Memorial të tillë. Kjo është ajo që mendoj, kur mendoj për terminologjinë, për atë që mendon populli hebre për ata që janë të drejtë.

Pas ngjitjes në pushtet të Hitlerit, shqiptarët shpëtuan qindra hebrenj nga vdekja e sigurt. Ku pushtuesit nazistë kërkuan një listë të qytetarëve hebrenj, qeveria shqiptare refuzoi.

Shqiptarët nga gjithë sferat e jetës, myslimanë, krishterë, të arsimuar, fshatarë, punuan për të shpëtuar miqtë e tyre, hebrenjtë. Është histori frymëzuese e besës shqiptare,” kryedidplomatja në Tiranë, Yuri Kim, duke u shprehur krenare që qeveria e SHBA nëpërmjet Komisionit të ruajtjes së trashëgimisë, ka mundësi të vlerësojë Shqipërinë nëpërmjet këtij memoriali.

“Falenderoj qeverinë e Shqipërisë, kryeministrin, kryebashkiakun Veliaj që mundësuan realizimin e këtij projekti. Do  doja të falenderoja shqiptarët për këtë shembull të shndritshëm.

Më lejoni gjithashtu, të vlerësoj John Withers, që bëri përpjekje të mëdha për ngritjen e këtij memoriali. Ai vëren se ‘’80 vjet më parë, errësira përfshiu botën, por drita shkëlqeu në Shqipëri. Miliona hebrenj, dhe popuj të tjerë u zhdukën. Kudo, përveç në Shqipëri, ku populli shqiptar qëndroi për jetën dhe mbroi miqtë e tyre. Ky memorial nuk ka të bëjë vetëm me të kaluarën, por dhe me të ardhmen’,’ tha Ambasadorja e SHBA në Tiranë, Yuri Kim duke përfunduar:

“Ky memorial na kujton gjithmonë rëndësinë e veprave të tilla. U frymëzofshim nga shqiptarët dhe hebrenjtë për veprimet tona humaniste dhe të nderit.”