Masivisht po i ulin qepenat, Basha: Paaftësia e Edi Ramës, vrastare për biznesin e vogël!

Paaftësia e qeverisë Rama për ti ardhur në ndihmë ekonomisë në këtë kohë krize të thellë, është vrastare për biznesin e vogël i cili punëson 70% të shqiptarëve, konstaton Kryetari i Partisë Demokratike, Lulzim Basha, sot kur bizneset e vogla po ulin masivisht qepenat.

“Ritmet e mbylljes së bizneseve të vogla po rriten çdo muaj. Sot ato po ulin masivisht qepenat duke lënë pa punë mijëra familjarë prej taksave të larta, korrupsionit dhe tarifave të shumta të pushtetit lokal,” vlerëson Lulzim Basha duke garantuar se Plani Ekonomik i Partisë Demokratike ka në themel të tij mbështetjen dhe nxitjen e bizneseve të vogla si gjenerator të punësimit të shqiptarëve.

“Një taksë e vetme sa 0.5% e xhiros, dhe do të heqim të gjitha taksat dhe tarifat lokale, për të luftuar informalitetin, për të rritur fitimin dhe për të nxitur punësimin. Karantinimi i çdo inspektoriati për 1 vit, deri në një reformë të vërtetë të standarteve europiane, do të zhdukë terrorin e bandave të inspektoriateve dhe do të rivendosë dinjitetin dhe lirinë e sipërmarrjes,” thekson sot Kryetari i Partisë Demokratike, Lulzim Basha, në reagimin e tij përmes rrjetit social Facebook duke përfunduar:

“Shqiptarët meritojnë dhe do të kenë një qeveri që me përgjegjshmëri dhe seriozitet do ti kthejë frymëmarrjen ekonomisë sonë.”