Sot Kryesia e PD, miratohet Komisioni i Vlerësimit të Kandidatëve

Sot Partia Demokratike vazhdon procesin e përzgjedhjes së kandidateve për deputetë me fazën e dytë ku seleksionimi i kandidatëve të dalë nga faza e parë do të bëhet nga Komisioni i Vlerësimit të Kandidatëve. Pikërisht për këtë qëllim Kryesia dhe Këshilli Kombëtar i PD pritet të miratojnë Komisionin e Vlerësimit të Kandidatëve, i cili do të përbëhet nga 5 anëtarë dhe 2 ndihmës.

Sipas vendimit të Kryesisë së PD, anëtarët Komisionit të Vlerësimit të Kandidatëve do të jenë ish-drejtues të lartë të partisë, personalitete të shoqërisë civile dhe medias, përfaqësues të botës akademike, etj.

Komisioni do të bëjë vlerësimin e secilit kandidat, nëse përmbush kriteret e parashikuara nga udhëzimi apo jo. Në përfundim të procesit hartohen dy lista:

1.Listën e kandidatëve që do t’i nënshtrohen procesit të konsultimit me anëtarët;

2.Listën e kandidatëve që u shtyhet aprovimi.

Kjo fazë është parashikuar të përmbyllet më 15 shtator për të vazhduar me fazën e tretë, atë të Konsultimit të listës se kandidatëve potencialë nga anëtarësia.

Ndryshe, procesi i përzgjedhjes së kandidateve për deputetë në Partinë Demokratike që nga dita e parë është përballur me diversion të mirëorganizuar nga partia e Edi Ramës si dhe propaganda e mediave në shërbim të tij, duke lançuar emra të dyshimtë jo vetëm për PD-në por edhe për familjet prej nga vijnë, për shkak të veprimeve të tyre politike dhe kriminale me rilindjen.