Jo Shteti po Kisha, zgjidh makabritetin në Kakavijë

Kryeministri Edi Rama e nisi ditën, ora 12:54, me pamjet nga pika kufitare Kakavijë ku dëshmohet fundi i makabritetit që përjetuan për 5 ditë shqiptarët duke falënderuar, sipas tij, “të gjithë ata që kontribuan për zgjidhjen e ngërçit të rëndë në pikën kufitare të Kakavisë” por nuk falënderoi vetëm ata që kishte zgjidh vërtetë problemin.

Këtë realitet, shqiptarët e kuptuan falë Ministrit të Shtetit për Diasporën, Pandeli Majko, i cili në naivitetin e tij jep dhe një detaj të rëndësishëm ku sqaron se ishte ai që i kishte kërkuar Kryepeshkopit Anasatas Janullatos ndërmjetësimin që kriza të përmbyllej sa më shpejt dhe ishte hirësia e tij që e zgjidhi çështjen, dhe siç thotë Majko, të tjerat janë fjalë!

“Falemnderit të gjithë atyre që kontribuan për zgjidhjen e ngërçit të rëndë në pikën kufitare të Kakavisë; qytetarëve në radhë të parë, që në shumicën dërrmuese patën mirëkuptim e durim megjithë hallin e madh; Emergjencave Civile, forcave të ushtrisë e të policisë, trupës së Urgjencës Shëndetësore dhe strukturave vendore, që u gjendën pranë njerëzve me përkushtim e pa orar; të gjithë atyre në vendin fqinj që u përfshinë pa rezervë në përpjekjen për ta lehtësuar situatën, në kushtet kur regjimi i ri kufitar e bënte punën për zgjidhjen e saj tejet të vështirë,” thotë Kryeministri Edi Rama në orët e para të ditës së hënë përmes rrjetit social Facebook duke bërë të ndjehen mirë me pamjet nga pika kufitare Kakavijë edhe indifirentët që e konsideronin punë të tyre edhe vuajtjen e 30 mijë shqiptarëve vetëm pse nuk kanë shtet, ndërsa nuk munguan as urimet:

“U uroj nga zemra një qetësim sa më të shpejtë dhe rifillim normal të jetës së përditshme, të gjithë bashkëqytetarëve që e hoqën atë siklet të madh dhe u lutem të tjerëve në vijim, të ndjekin me vëmendje kriteret e përcaktuara në shtetin fqinj për kalimin e kufirit, e të mos nisen pa u siguruar se mund ta kalojnë kufirin pa siklete të ngjashme,” tha Edi Rama në urimin e tij duke përfunduar:

“Rrugë të mbarë udhëtarëve të fundit dhe ruani veten e të tjerët nga virusi i rrezikshëm COVID-19.”

Falënderoi dhe uroi të gjithë që kontribuan, sipas tij, në zgjidhjen e problemit por nuk uroi vetëm atë që zgjidhi problemin, Krypeshkopin Janullatos. Këtë nuk do ta dinin shqiptarë kurrë po të mos ishte Ministri i Shtetit për Diasporën, Pandeli Majko. Por, ja që është, dhe ka raste kur nuk pyet njeri për të thënë edhe atë “që nuk thuhet”.

“Falenderim për të gjitha strukturat shtetërore të angazhuara për përmbylljen e emergjencës humanitare veçanërisht për trupën ushtarake dhe policore të angazhura në kufirin me Greqinë fqinje, nën drejtimin e kolegëve Olta Xhaçka dhe Sandër Lleshi,” thotë në reagimin e tij Pandeli Majko, përmes rrjetit social Facebook duke saktësuar:

“Ndaj si më të veçantë, që pavarësisht moshës, angazhimin të cilin ja kërkova kryepeshkopit Anasatas Janullatos, në ndërmjetësimin që kriza të përmbyllej sa më shpejt.

Të tjerat, janë fjalë për ‘lugën’ e atyre që dinë veç çfarë nuk duan.”

Vërtetë të tjerat janë fjalë, dhe shqiptarët që nuk kanë Kryeministër ka kohë që e dinë por pas 5 ditë torturash e kuptuan se kanë President vetëm për të sharë Edi Ramën.

Ndryshe, sikur Ilir Meta të ishte shqetësuar aq shumë për shqiptarët që po torturohen në pikën kufitare Kakavijë, në vend se të merrej me Edi Ramën, do të kishte telefonuar Kryepeshkopin Janullatos, të cilit pas 30 vjet shërbimi në tokën shqiptare, gjeti arsyet për ta dekretuar si shtetas shqiptar.