Britania e Madhe i jep Serbisë dron për kërkimin e varrezave masive. Pritet kush do t’ia jep vullnetin…

Britania e Madhe ka mundësuar blerjen e një droni për Serbinë për të zhdukurit e konflikteve në Ish-Jugosllavi, të cilët dyshohet se janë të varrosur në varreza masive por ende nuk dihet se kush do t’ia jep vullnetin për të treguar se ku janë varrezat me trupat e pajetë joserb.

Donacioni i kësaj pajisjeje për hulumtimin e terrenit i është dorëzuar Beogradit me rastin e 30 gushtit, Ditës Ndërkombëtare të të Pagjeturve. Beogradi ka bërë të ditur, raporton RFE, se ka kërkuar nga Prishtina që të hulumtojë disa terrene, në të cilat dyshohet se ka serbë të vrarë.

“Fillimisht do të hulumtohen tri lokacione të propozuara nga Prishtina, ku pretendohet se ka shqiptarë të vrarë. Një lokacion është në afërsi të Rudnicës, tjetri është Kozarevë që gjendet në mes të Rashkës dhe Novi Pazarit kurse lokacioni i tretë është në afërsi të Sjenicës. Këto informacione i kemi marrë nga Prishtina dhe jemi pajtuar që t’i verifikojmë,” tha Kryetari i Komisionit të Qeverisë serbe për të Pagjeturit, Velko Odalloviç, duke shtuar se Beogradi ka informacione për disa lokacione në Kosovë ku ka serbë të vrarë, duke thënë se bëhet fjalë për Kosharen, Liqenin e Livoçit dhe rajonin e Llapushnikut.

Përfaqësuesit e Organizatës së Kombeve të Bashkuara për Zhvillim, UNDP, ambasadës britanike dhe qeverisë serbe kanë thënë se në vend të gropimit të komplikuar me makineri ndërtimore, hulumtimi i lokacioneve të dyshimta do të bëhet me këtë pajisje elektronike, e cila heton ndryshimet e tokës deri në 10 metra thellësi, por nuk sqaruan se kush do ti jep vullnet Aleksandar Vuçiçit për të treguar se ku janë 1.643 shqiptarët që sot rezultojnë të zhdukur nga viti 1999 meqë nuk janë çështje droni por krim serb ndaj popullsisë shqiptare në Kosovë.

Ndryshe, Komisionet për të Pagjeturit, të Kosovës dhe Serbisë, do të takohen në Prishtinë më 16 shtator.