Nis viti i ri shkollor në Kosovë

Sot nisi viti i ri shkollor në Kosovë. Në kohë pandemie, nxënësit dhe mësimdhënësit duhet t’iu përmbahen rregullave për t’u mbrojtur nga koronavirusi. Autoritetet thanë se mbajtja e maskës, distancës dhe higjiena personale, janë rregullat që duhet të aplikohen në shkolla.

Ja cili ishte realiteti shkollor sot përmes fotografive që sjell RFE nga shkolla fillore “Ismail Qemali” në Prishtinë.

Në Kosovë, sot më 14 shtator ka nisur viti i ri shkollor, teksa Ministria e Arsimit dhe Shkencës tha se janë bërë të gjitha përgatitjet që procesi mësimor të zhvillohet duke respektuar masat për mbrotje nga sëmundja COVID-19, që shkakton koronavirusi i ri.

Nxënësit dhe mësimdhënësit duhet të mbajnë maska në ambientet shkollore. Sipas rekomandimeve të Institutit Kombëtar të Shëndetësisë Publike të Kosovës, shkollat duhet të sigurojnë që të respektohet distanca e caktuar e sigurisë të paktën 1.5 metra.

Secilit nxënës si dhe personelit të shkollës duhet t’i bëhet matja e temperaturës përmes termometrit laserik çdo ditë. 

Autoritetet shtetërore të Kosovës kanë njoftuar se kanë shpërndarë gjysmë milioni maska nëpër shkollat e Kosovës.

Ministria e Shëndetësisë së Kosovës ka thënë se inspektorët sanitarë do të mbikëqyrin nëse shkollat po respektojnë rekomandimet për mbrojtje nga koronavirusi. 

Viti i ri shkollor në Kosovë është dashur të nisë më 1 shtator, por u shty, pasi Ministria e Arsimit tha se kjo u bë me qëllim që të sigurohen kushtet e sigurta për fëmijët, mësimdhënësit dhe prindërit./RFE/