“Tirana vjen tek ti” në Prishtinë
Në kuadër të shënimit të 100 vjetorit të Tiranës si kryeqytet i Shqipërisë, muzeu lëvizës “Tirana vjen tek ti” vazhdoi rrugëtimin nëpër qytetet e Kosovës.
Sot, “Tirana vjen tek ti” ka sjellë në Prishtinë historikun e Tiranës si kryeqytet i Shqipërisë përmes fotografive dhe dëshmive tjera arkivore, të cilat pasqyrojnë momente shumë dimensionale të kryeqytetit shqiptar.
Në hapjen e muzeut, nënkryetari i komunës së Prishtinës, Muhedin Nushi, tha se ky muze lëvizës synon promovimin e turizmit dhe kulturave në vendet shqipfolëse. Ai ka theksuar se nisma e Tiranës duhet të transformohet në aktivitet tradicional vjetor.
“Ky muze lëvizës synon promovimin e turizmit, kulturës dhe traditave të qyteteve shqip folëse, tani më të bashkuara në Unionin e Bashkive shqiptare në rajon. Iniciativa e organizimit të këtij muzeu lëvizës nga bashkia e Tiranës, do të mundësoj edhe promovimin dhe zhvillimin e ekonomisë lokale, po në të njëjtën kohë ajo do të strehoj rrugëtimin dhe kujtesën e një qyteti që bëri gjatë një shekulli dhe u shndërrua në kryeqytetin e të gjithë shqiptarëve. Nisma e Tiranës duhet të transformohet në aktivitet tradicional vjetor si dhe të zgjerohen këto muze lëvizëse,” tha Nushi.
Ndërsa, nënkryetarja e Bashkisë së Tiranës, Anuela Ristani, tha se në këtë 100 vjetor vendosën që historinë e Tiranës të sjellin edhe në Prishtinë. Derisa ka theksuar se bashkëpunimi në mes të dy kryeqyteteve nuk duhet të mungojë.
“Për mua është shumë emocion sot, jo sepse nuk di çfarë të them por se kam kaq shumë gjëra për të thënë. Për Tiranën dhe Prishtinën kjo çështja e vizitave reciproke nuk është fare sfidë sepse ne sa herë që themi po shkojmë në Prishtinë është njësoj si të themi po shkojmë në Durrës, kështu që nuk e kemi sfidën e të pa njohurës. i gjithë synimi i bashkive në rajon është pikërisht kjo t’i mbledhim të gjithë pran dhe të bashkëpunojmë për të mirën e gjithë secilit.”
Duke falënderuar për mikpritjen në qytetet e Kosovës, Drejtorja ekzekutive e Unionit të Bashkive Shqiptare të Rajonit, Andriola Kambo, u shpreh se Unioni ka për qëllim integrimin me njëri-tjetrin.
“Jam shumë e lumtur që sot jemi në Prishtinë, në fakt vimë nga një tur nga qytete tjera të dashura të Kosovës, Prizren, Gjakovë, Pejë që na kanë pritur me shumë dashuri. Sot jemi afër heroit tonë kombëtar, jemi në dy kryeqendrat e Shqiptarëve që janë Tirana dhe Prishtina…Në fakt unioni i bashkive shqiptare në rajon si qëllim ka integrimin me njëri tjetrin që ne të vazhdojmë drejtë BE-së, ku ne aspirojmë të jemi pjesë me shekuj. Sot kemi sjell një copëz të Tiranë, kemi sjell sheshin “Skënderbe”, sheshi simbol i shqiptarëve, që çdo gur i sheshit Skënderbe ka një histori,” tha Kambo.
Muzeu lëvizës “Tirana vjen tek ti”, ka filluar rrugëtimin në trojet shqiptare më 16 shtator dhe përfundon nesër më 20 shtator në Preshevë.
