Prokuroria në Hagë, përfundon intervistimi i Agim Çekut

Ka përfunduar intervistimi i Ish-Komandantit të Shtabit të Përgjithshëm të Ushtrisë Çlirimtare të Kosovës, Agim Çeku, nga Zyra e Prokurorit të Specializuar në Hagë. Këtë e ka konfirmuar për RFE, avokati Artan Qerkini, i cili nuk tregoi nëse Çeku është mbrojtur në heshtje apo i është përgjigjur pyetjeve të prokurorëve.

Ish-Komandanti i Shtabit të Përgjithshëm të Ushtrisë Çlirimtare të Kosovës, më herët ishte shprehur për RFE se ai është ftuar nga Zyra e Prokurorit të Specializuar për intervistim në cilësinë e të dyshuarit.

Dhomat e Specializuara dhe Zyra e Prokurorit të Specializuar, që ndryshe njihen edhe si Gjykata Speciale, kanë selinë në Hagë dhe merren me hetimin e krimeve të supozuara të luftës të pjesëtarëve të ish-Ushtrisë Çlirimtare të Kosovës.

Sot, para gjykatës së Dhomave të Specializuara do të dalë për herë të parë ish-eprori i UÇK-së, Salih Mustafa, nën dyshimet për kryerjen e krimeve të luftës gjatë vitit 1999.

Salih Mustafa është arrestuar më 24 shtator pasi i ishte konfirmuar aktakuza për dyshimet për kryerjen e krimeve të luftës, përfshirë këtu veprat penale: ndalim arbitrar, trajtim mizor, torturë dhe vrasje të paligjshme.