Maqedoni e Veriut, edhe 22 viktima dhe 561 të infektuar me koronavirus

Në Maqedoninë e Veriut sot 22 qytetarë e kanë humbur betejën me koronavirusin që është dhe shifra më e lartë brenda një dite, që nga fillimi i pandemisë në muajin mars.

Ministri i Shëndetësisë, Venko Filipçe, ka njoftuar se shtatë viktima janë regjistruar në Shkup, të moshës nga 55 deri në 78 vjeç, nga dy viktima janë regjistruar në qytetet e Dibrës, Gostivarit, Kriva Pallankës, Manastirit dhe Velesit ndërsa nga një në Koçanë, Prilep dhe Dellçevë. Dy nga viktimat kanë ndërruar jetë jashtë spitaleve, ndërsa të tjetër ishin duke u trajtuar në qendrat e përkujdesit shëndetësor.

Në raportin e Ministrisë së Shëndetësisë, raporton RFE, janë përfshirë edhe disa raste që kanë ndërruar jetë më herët se 24 orë ndërsa janë përfshirë në raportin e ditës së diel meqë janë testuar pas vdekjes.

Me këtë numri i përgjithshëm i viktimave ka arritur në 919.

Sipas raportit, janë 561 raste të reja me koronavirus nga 1.901 persona të testuar dhe 197 të shëruar. Numri më i madh i të infektuarve është në Shkup, gjithsej 271 raste, sikur dhe numri i të shëruarve 91 persona.

Deri më tani, me COVID-19 në Maqedoninë e Veriut janë diagnostikuar 26.954 persona, prej tyre 18.627 janë shëruar ndërsa aktiv janë 7.408 raste.

Që nga fillimi i pandemisë janë testuar gjithsej 235.038 persona.