Policia serbe ka gjetur sasi të mëdha armësh afër Bujanocit

Ministria e Brendshme e Serbisë ka bërë të ditur se në fshatin Konçul të Bujanocit, që gjendet në afërsi të vijës kufitare mes Kosovës dhe Serbisë është gjetur sasi e madhe e armatimit.

Armatimi i gjetur nën një shkëmb, sipas ministrisë serbe, përfshinë 137 municione për granata hedhës, raketë dore, një minë anti-tank, dylbi për mbikëqyrje natën, katër kuti me 1,436 copë municion pushke të kalibrave të ndryshëm dhe një uniformë kamuflazhi.

Me urdhër të Zv/Prokurorit të Prokurorisë së Lartë Publike në Vranjë, pjesëtarët e policisë po zhvillojnë hetime.

Sipas Ministrisë së Brendshme, Prokuroria urdhëroi policinë të paraqesë padi penale kundër autorëve të panjohur për shkak të ekzistencës së bazave të dyshimit se ata kanë kryer krimin e prodhimit të paligjshëm, posedimit, mbajtjes dhe trafikimit të armëve dhe eksplozivëve.

“Anëtarët e policisë, me urdhër të prokurorisë, po marrin të gjitha masat dhe veprimet brenda kompetencës së tyre në mënyrë që të hedhin dritë mbi këtë akt kriminal,” tha ministria e Brendshme e Serbisë./RFE/