Minatorët në grevë, jep dorëheqje U.D. Drejtori i Bordit të Trepçës

Pasi minatorët u futën mbrëmë në grevë, sot Ushtruesi i detyrës së drejtorit të Bordit të ndërmarrjes “Trepça”, Hysen Vrajolli, dha dorëheqje.

“Pas ngjarjeve që kanë ndodhur në Trepçë kam paraqitur dorëheqjen,” tha Vrajolli për RFE.

Mbrëmë mbi 80 minatorë të kombinatit metalurgjik “Trepça” kanë hyrë në grevë brenda minierës dhe sot ky numër k arritë në 200 pasi iu bashkuan edhe minatorët e turnit të parë.

“Për momentin janë 200 minatorë brenda minierës. Ata janë ndarë në horizonte dhe kanë thënë se nuk do të dalin nga greva derisa t’i marrin pagat,” tha Kryetari i Sindikatës së punëtorëve të Trepçës, Gani Osmani, duke shtuar se me gjithë paralajmërimin e Qeverisë se janë ndarë 1 milion euro për Trepçën, ato nuk janë alokuar në xhirollogarinë e ndërmarrjes dhe punëtorët nuk i kanë marrë pagat e muajit tetor.