U.D. Presidentja e Kosovës dekreton Ligjin për Rimëkëmbje Ekonomike
Ushtruesja e detyrës së Presidentit të Kosovës, Vjosa Osmani, ka dekretuar Ligjin për Rimëkëmbje Ekonomike, i cili u miratua në Parlamentin e Kosovës më 4 dhjetor.
Lajmin e ka konfirmuar për RFE, këshilltari i Osmanit, Artan Murati.
“Ligji është dekretuar dje (të shtunën),” tha Murati.
Ligji për Rimëkëmbje Ekonomike, është plotësimi dhe ndryshimi i disa ligjeve, pas efekteve negative të shkaktuara nga pandemia COVID-19.
Ai është votuar nga 72 deputetë të Parlamentit të Kosovës dhe nuk është përkrahur nga deputetët e subjektit më të madh opozitar, Lëvizjes Vetëvendosje.
Kryeministri i Kosovës, Avdullah Hoti tha se ky ligj kap shifrën e rreth 600 milionë eurove.
Ky ligj parashikon që kontributpaguesit mund t’i tërheqin 10 për qind të kursimeve pensionale në Fondin e Kursimeve Pensionale të Kosovës. Sipas këtij ligji, kontributpaguesit që kanë kursime pensionale deri në shumën 10 mijë euro, në rast të tërheqjes së 10 për qindëshit nga ana e tyre, Qeveria e Kosovës do ta kompensojë atë brenda pesë vjetëve të ardhshme.
Sipas këtij ligji, të gjithë punëtorët e sektorit privat të regjistruar si të papunë, e që kanë qenë në marrëdhënie pune deri në shtator 2020, por që nga muaji tetor 2020 janë liruar nga punëdhënësi si pasojë e ndikimit të COVID -19, do të paguhen nga ana e qeverisë së paku tre deri në katër muaj përkatës.
Po ashtu në bazë të ligjit do të themelohet granti në shumë prej 200 milionë eurosh, për ndihmë direkte financiare bizneseve, të cilat kanë vështirësi funksionimi si rezultat i ndikimit të COVID-19, ndërkaq që Qeveria e Kosovës do të lirojë nga TVSH-ja lëndën e parë, e cila prodhohet nga bizneset kosovare, pavarësisht se a eksportohet jashtë vendit apo jo.
Ky ligj parashikon edhe një sërë masash tjera lehtësuese për bizneset në Kosovë.
Sipas Kushtetutës së Kosovës, pasi një ligj dekretohet nga presidenti ai publikohet në Gazetën Zyrtare. Ligji hyn në fuqi 15 ditë pas publikimit në Gazetën Zyrtare të Republikës së Kosovës, përveç nëse, në vetë ligjin nuk përcaktohet ndryshe.
