Dita e katërt e protestës, më pak protestues më shumë gaz lotsjellës dhe arrestime
Me thirrjet “Poshtë komunizmi!”, “Policia e krimit” nisi dita e katërt e protestës, përveç se me revoltën pas vrasjes së 25-vjeçarit Klodian Rasha nga policia tashmë edhe me zemërimin për shkak të dhunës që përdori policia për tre ditë ndaj protestuesëve.
Fillimisht një grup të rinjësh u mbledhën pranë Kryesisë së Parlamentit, u nisën në marshimin pa u ndalur para Kryeministrisë, vazhduan marshimn në Bulevard duke ecur në drejtim të Drejtorisë së Policisë së Tiranës.
Kjo është dita e katërt që protestohet në kryeqytet dhe gjatë ditëve të kaluara ka pasur efektivë dhe protestues të plagosur. Janë shoqëruar me dhjetëra protestues dhe janë proceduar qindra të tjerë.
Protestuesit ngritën duart lartë gjatë marshimit në shenjë paqeje me policinë e cila ishte në gjendje gatishmërie për vepruar madje filluan të bëjnë thirrje që të mos ketë dhunë ndaj policëve.
Përkundër gjithë këtyre thirrjeve, policia përdori që në fillim gazin lotsjellës për të shpërndarë turmën e irrituar e cila si në tre ditët e para filluan rigrupimet.
Fillimisht asnjë protestues nuk kreu veprime të dhunshme por kur protestuesit mbërritën tek Ministria e Brendshme dhe lëvizën në drejtim të rrugës Myslim Shyri, disa minorenë nisën që të thyejnë semaforët dhe ti fusin flakën disa koshave të plehrave ndërkohë u dëgjuan edhe shpërthime të kapsollave.
Për dallim nga netët tjera, hyrja e rrugës “Myslim Shyri” u blindua për të mos lejuar protestuesit të mbërrijnë tek Drejtoria e Policisë, dhe me gardhe me policë të shumtë, dhe me skafandra e kundra gaz filluan të gjurmojnë hap pas hapi protestuesit nëpër gjithë rrugicat e kryeqytetit, dhe filluan shoqërimet.
Edhe sonte u bë e ditur për një efektiv policie të plagosur në sy por mungoi informacioni mbi protestuesit e plagosur ndonëse vetëm gjatë prangosjes u panë disa të gjakosur.
Gjithsesi policia ia arriti qëllimit, edhe pse numri i protestuesve ishte shumë më i pakët dhuna ishte shumë më e madhe; Komisariatet e policisë u mbushën me protestues të shoqëruar, protesta arriti të shuhe shumë shpejtë, dhe në rrugët e kryeqytetit ngelën vetëm forcat speciale të policisë.
Ndërkohë gazi lotsjellës përfundoi në shtëpitë e atyre që kanë fatin të jetojnë në qendër të qytetit.
