“Air Albania”, vaksinohet ekipi i Urgjencës Kombëtare

Sot në qendrën e vaksinimit në Stadiumin “Air Albania” është vaksinuar stafi i Urgjencës Kombëtare, me ç’rastkreu i saj Dr. Skënder Brataj u shpreh:

“Vaksina të siguron mbrojtje, do presim edhe 21 ditët që të bëjmë dozën e dytë. Por midis këtyre dy vaksinave duhet të vijojmë të ruhemi”, tha Brataj.

Procesin e vaksinimit të stafeve mjekësore e ka ndjekur nga afër Ministrja e Shëndetësisë dhe Mbrojtjes Sociale, Ogerta Manastirliu.

“Po vijojmë intesivisht me të gjithë ekipet tona. Po përfundon QSUT, Urgjenca Kombëtare, spitali Dibrës, Krujës, sot vetëm tek Arena Kombëtare vaksinohen më shumë se 500 punonjës të shëndetësisë, ndërkohë që vijon vaksinimi edhe për të moshuarit në shtëpitë e të moshuarve. Jemi në një moment pune intesive,” tha Ogerta Manastirliu duke shtuar se sipas planit të vaksinimit do të vijojë edhe vaksinimi për të moshuarit mbi 80 vjeç, me planifikim nga mjekët e familjes.

Ndryshe, deri tani janë vaksinuar 5.612 mjekë dhe infermierë me dozën e parë, ndërsa 655 personel shëndetësor i kanë marrë të dy dozat e vaksinës. Gjithashtu janë vaksinuar 461 të moshuar dhe staf që kujdeset për ta. Që nga fillimi i vaksinimit janë kryer në total 6728 vaksina Anticovid-19, ndërsa sot pritet të kryhen rreth 1.000 vaksina në të gjithë vendin.