Epopeja e UÇK-së, Presidentja Osmani dhe Albin Kurti homazhe në Prekaz

E kemi borxh që kujtesën historike dhe mirënjohjen e thellë ta bartim brez pas brezi në mënyrë që të kujtohet se sa i lartë ishte çmimi që pagoi populli shqiptar që sot ta kemi shtetin tonë, tha U.D. Presidentja e Kosovës, Vjosa Osmani, pas homazheve në Kompleksin Memorial “Adem Jashari”, në Prekaz, së bashku me Kryetarin e Lëvizjes Vetëvendosje, Albin Kurti.

“Jemi këtu në Prekaz në vendin që bëri bashkë një Komb të tërë rreth kauzës për çlirim, në vendin që është shndërruar në ikonë të lirisë, dhe në simbol të sakrificës më sublime të komandantit legjendar Adem Jashari, të bacës Shaban dhe sakrificës më sublime të gjithë familjes Jashari, një sakrificë sublime që rezultoi me lirinë dhe shtetin e Kosovës. E kemi borxh që kujtesën historike e mbi të gjitha ndjenjën e mirënjohjes së thellë ta bartim brez pas brezi në mënyrë që edhe fëmijët tanë por dhe fëmijët e fëmijëve tanë ta kujtojnë se sa i lartë ishte çmimi që pagoi populli shqiptar në mënyrë që sot ta kemi shtetin tonë,” tha Presidentja e Kosovës, Vjosa Osmani, ndërsa Kryeministri i ardhshëm, Albin Kurti, siguroi se institucionet do të angazhohen për t’i përballur me drejtësinë personat përgjegjës për këto krime.

“Për këtë sulm të Serbisë ndaj familjes Jashari askush nuk është gjykuar dhe s’ka pasur gjykim për këtë krim shtetëror të Serbisë. Drejtësia është vonuar sepse s’ka filluar. Ata u flijuan për hir të pasardhësve të popullit dhe kombit në përgjithësi.”

Ndryshe, homazhe në ditën e dytë të Epopesë së UÇK-së në Kompleksin Memorial “Adem Jashari” bënë edhe liderët tjerë institiucional dhe politik të Kosovës, për të vijuar në bazë të axhendës aktvitetet e organizuar anga Komuna Skenderaj dhe Qeveria e Kosovës.