Me fermerët në Berat, Tomorr Alizoti: Bujqësia, në kushte mesjetare!

Subvencionimi në teknologjinë bujqësore është i domosdoshëm, tha Drejtuesi Politik i PD për Qarkun Berat, Tomorr Alizoti, pas takimit me fermerët beratas ku konstatoi se bujqësia në këtë zonë ka nivel më keq se mesjetar.

“Subvensionet që kam marrë nuk kanë qenë të mjaftueshme për t’u përballur me tregun evropian. Ne me kushtet që kemi dhe me subvencionet që na janë dhënë ne jemi të fundit, jo vetëm në rajon, por brenda Shqipërisë, sidomos ne qarku i Beratit. Bujqësia shqiptare ka mbetur si në mesjetë. Unë bëj thirrje që qeveria që do të vijë më 26 prill të ketë programe afatgjata dhe të mbështetura në fushën e blegtorisë, si një nga fushat më të vështira, ku punohet 24 orë,” tha fermeri deri sa Tomorr Alizoti u shpreh qartë se subvencionimi i bujqësisë është një nga planet konkrete të Partisë Demokratike.

“Subvencionim direkt, investim në teknologjinë bujqësore është i domosdoshëm, pasi bujqësia ka nivel më keq se mesjetar. Është jo e konkurueshme. Nuk konkurron brenda vendit, jo më të konkurojë tregun rajonal, si Kosova. Ndryshimi do të vijë jo vetëm për ju, por për të gjithë shqiptarët, pasi Shqipëria e ka të domosdoshëm ndryshimin ekonomik dhe politik,” tha Drejtuesi Politik i PD për Qarkun Berat, Tomorr Alizoti, në bisedë me fermerët në Berat u shpalosi dhe Programin e PD për Bujqësinë.